QR Bala quqyqtary jónindegi ýákili Zaǵipa Balieva Reseidiń Kemerovo qalasyndaǵy qaiǵyly jaǵdaidan keiin mekeme, uiym men ǵimarat basshylaryna úndeý jasady, dep habarlaidy QazAqparat tilshisi.
«QR Bala quqyqtary jónindegi ýákil Resei Federatsiiasynyń Kemerovo qalasyndaǵy balalardyń ólimine ákep soqqan qaiǵyly jaǵdaiǵa bailanysty kóz jumǵandardyń týǵandary men jaqyndaryna kóńil aitady. Marqumdardyń týǵan-týystary úshin bul - orny tolmas qaza, úlken qaiǵy. Jaýapty adamdardyń óz isine salǵyrt qaraýy balalardyń ólimine ákep soqtyrǵan bul jaǵdai - biz úshin de sabaq», - delingen habarlamada.
Zaǵipa Balieva ár túrli oiyn-saýyq ortalyqtarynyń, saýda úileriniń, kinoteatrlar men adamdar kóptep jinalatyn oryndardyń basshylaryn óz ǵimarattarynda qaýipsizdik erejelerin saqtap, qaýipsizdik tehnikasy men kúzet qyzmeti kezinde aqshany únemdep qalmaýǵa, ǵimaratqa kelýshilerdiń barlyǵy, ásirese balalar bos ýaqytyn tolyq qaýipsizdikte ótkize alatyndai jaǵdai jasaýǵa shaqyrdy.
«Balalar úiiniń, mektepke deiingi mekemelerdiń, kolledjder men barlyq oqý oryndarynyń direktorlary óz ǵimarattaryn, baspaldaqtan bastap, astyn da, shatyryn da tekserip, óz aýmaǵyndaǵy qaýipsizdikke kóz jetkizip alǵany abzal bolar. Al resmi memlekettik organdar zańnamaǵa sáikes, mekemelerdiń, oryndardyń, uiymdardyń basshylaryn qaýipsizdik tehnikasynyń erejelerine sáikes tekseris júrgizgeni jón», - delingen habarlamada.
Eske sala ketsek, 25 naýryz kúni Reseidiń Kemerovo qalasynda «Zimniaia vishnia» saýda úiinde órt shyǵyp, sońǵy derekterge sáikes 64 adam qaza tapqan bolatyn.
