IX Azamattyq forýmda QR Parlamenti Májilisiniń depýtaty Irina Smirnova «Otbasylyq-turmystyq zorlyq-zombylyqqa qarsy is-qimyl týraly» zań jobasynyń negizgi maqsattaryn aityp berdi, dep habarlaidy QazAqparat.
«Turmystyq zorlyq-zombylyq máselesi qaralady degende, tutas qoǵam serpin aldy deýge bolady. Bul otbasylyq-turmystyq qarym-qatynastardyń qandai mańyzdy ekenin taǵy da kórsetedi. Ár adam óz otbasynyń saqtalyp qalýyn, jeke shegi bolǵanyn qalaidy. Men balany shapalaqpen urýǵa qarsymyn. Balany qatygezdikpen tárbieleýdi durys dep sanamaimyn», - dedi depýtat IX Azamattyq forýmnyń «Azamattyq qoǵam zorlyq-zombylyqqa qarsy» alańynda.
Onyń aitýynsha, otbasyndaǵy qatal tárbie men meiirimsizdik balalardyń óz-ózine qol jumsaýy sekildi qaiǵyly saldarǵa ákep soǵýy múmkin.
«Sońǵy zertteýler kórsetkendei, úide uryp-soǵatyn balalardyń 25%-y jábirleýshi bolyp shyǵady. Qanshama balalardyń sýitsidten kóz jumǵanyn da bilemiz. Sýitsidtiń basty sebebi ne – kóbinese otbasyndaǵy jaǵdai, tuiyqtyq, qatal tárbie. Men daǵdarys ortalyǵyna keletin áielderdi kórdim, taiaqqa jyǵylǵan ana, úreilengen balalar. Balalar daǵdarys ortalyǵynda kóńilderi jailanyp, eshkim olarǵa aiqailamaidy, jaǵdaiyn jasaidy. Bul balalar óz úiinde dál osyndai jaǵdaida ósýi tiis edi. «Otbasylyq-turmystyq zorlyq-zombylyqqa qarsy is-qimyl týraly» zań jobasynyń negizgi maqsaty – turmystyq qorlyq-zombylyq oqiǵalaryn azaitý jáne agressordyń áreketin shekteý», - dep túsindirdi I. Smirnova.
