Foto: aigak.kz
2024-2025 jańa oqý jylynyń bastalýyna da az ýaqyt qaldy. Taýar baǵasy jyldan jylǵa kóterilip, ata-analar mektep quraldarynyń shyǵyny artyp jatqanyn aityp shaǵymdanýda. Biylǵy jyly elorda dúkenderinde baǵa qalai ózgergenin ULT.KZ tilshisi anyqtap kórdi.
Mektepke eń qajetti satyp alýlar tizimine biz Qazaqstanda resmi bekitilgen standart boiynsha mektep formasy, aiaq kiimder, riýkzak jáne keńse taýarlaryn aldyq.
Aita keteiik, joǵarǵy synyp jáne tómengi synyp oqýshylaryna qajetti qural-jabdyqtyń túri men kiimniń ólshemine bailanysty shyǵyn ár túrli bolǵandyqtan, biz bastaýysh synyp oqýshylaryna arnalǵan taýar qunyn qarastyrdyq.
Sondai-aq, bul shyǵynǵa kún sýytqanda kietin báteńke, kýrtka, bas kiim siiaqty shyǵyndardy, muǵalimge beretin gúl shoǵy, jeideniń ishinen kietin maika, noski men golfi, qyzdardyń shashyna taǵatyn rezinka, qystyrǵysh siiaqty usaq-túiek shyǵyndar, balalardyń úidegi qajetti quraldary (sabaq oqityn ústeli men oryndyǵy, kitap sóresi, ústel shamy, qalam-qaryndashtardy salatyn organaizer) kirmedi, birinshi synypqa baratyn balalardyń tilashar toiy da bul shyǵynǵa jatpaidy.
Qajetti quraldar men kiim-keshekterdi eldegi tanymal balalar taýarlaryn satatyn dúkenderdiń saittarynan qarastyryp kórdik. Atap aitqanda: Detskii mir, Kari kids, DeFacto, Orchestra, Ostin-niń Astanadaǵy dúkenderindegi baǵany saraptap, salystyrdyq.
Eskere keteiik, Statistika biýrosynyń málimetine súiensek, Qazaqstan Respýblikasy boiynsha ataýly jalaqynyń ortasha máni 2024 jylǵy I toqsanda 382 279 teńgeni qurady. 2023 jyldyń tiisti toqsanyna qaraǵanda ósim 12,3%, naqty mánde – 2,7% boldy. Jalaqynyń medianalyq máni (jalaqy qatarynyń ortalyq deńgeii) 2024 jylǵy I toqsanda baǵalaý boiynsha 251 997 teńgeni qurady.
Memlekettik standart boiynsha uldardyń mektep formasy: pidjak, keýdeshe, shalbar, merekelik jeide, kúndelikti jeide, ne túimeleri bar nemese sydyrmaly toqylǵan kúrte/kardigan, polo jeide nemese tenniska (qysqy mezgilde: trikotaj jilet, vodolazka). Uldarǵa arnalǵan shalbarlar erkin tigilgen jáne uzyndyǵy boiynsha tobyqty jaýyp turady.
Mektep formasy: 13000-30 000 teńge aralyǵynda
Aq tústi jeide: 4000-15000 teńge shamasynda
Aq tústi polo jeide: 4000-9500 teńgedei turady
Mektepke kietin shalbar: 7000-13000 teńge aralyǵynda
Keýdeshe: 5000-10000 teńge aralyǵynda
Toqyma kardigan: 10000-18000 teńge shamasynda
Galstýk: 6000 teńge aralyǵynda
Týfli: bylǵarydan tigilgeni – 25000 teńge, jasandy bylǵarydan tigilgeni - 7500 teńge shamasynda.
Foto: Balalar dúkeniniń skrinshoty
Qyzdardyń mektep formasy: pidjak, keýdeshe, beldemshe, shalbar, klassikalyq jeide, ne túimeleri bar nemese sydyrmaly toqylǵan kúrte/kardigan, polo jeide nemese tenniska (qysqy ýaqytta: trikotaj jilet, sarafan, vodolazka). Qyzdarǵa arnalǵan shalbarlar erkin tigilgen jáne uzyndyǵy boiynsha tobyqty jaýyp turady.
Mektep formasy: 24000 teńge
Sarafan: 10000-22000 teńge shamasynda
Jeide: 6000-19000 teńgedei turady
Beldemshe:6000-20000 teńge shamasynda
Shalbar: 10000-24000 teńge aralyǵynda
Keýdeshe: 4500-13000 teńge aralyǵynda
Toqyma kardigan: 6000-8000 teńge shamasynda
Aq tústi bant: 1000-1500 teńge teńge aralyǵynda baǵalanady
Týfli: bylǵarydan tigilgeni – 25000 teńge, jasandy bylǵarydan tigilgeni -10000 teńge shamasynda.
Foto: Balalar dúkeniniń skrinshoty
Uldar men qyzdarǵa arnalǵan sporttyq forma sporttyq kostiýmnen (sporttyq shalbar, kýrtka, fýtbolka), sporttyq aiaq kiimnen (krossovka, kedy) turady. Sporttyq kiimderdiń quny qyz balalar men uldarǵa shamalas.
Sporttyq kostiým: 9000-25000 teńge shamasynda
Fýtbolka:3000-5000 teńge aralyǵynda
Krossovka: 7500-55000 teńge aralyǵynda
Mektep formasyna orta bilim berý uiymynyń erekshelik belgilerin (belgiler, tigispeler, shevron jáne t.b.) ornalastyrýǵa ruqsat etiledi. Mundai belgiler tigin fabrikalary men tsehterine arnaiy tapsyrys berý aqyly jasalady.
Riýkzak pen dorba
Atap ótken balalar dúkenderinde riýkzaktar baǵasy 2000 teńgeden bastalyp, 35000 teńgege deiin barady.
Sporttyq kiim men aiaq kiim salatyn dorbalardyń eń arzany 890 teńge turady, al ortasha quny 5000 teńge shamasynda.
Qalam salatyn penaldyń baǵasy 1000-6000 teńge shamasynda satylyp tur. Qaǵaz-qalam salatyn papkany 2000 teńgege de alýǵa bolady.
Eskeretin bir jait, oqýshy taýarlary kóp jaǵdaida sapasy qunyna qarai joǵarylaidy. Sondyqtan arzannyń jiligi tatymaityn bolyp shyǵýy da bek múmkin.
Keńse taýarlary
Keńse taýarlaryna da suranyspen birge usynys ta alýan túrli. Dál qazirgi ýaqytta biz kórgen dúkenderde 12 paraqtyq dápter – 19 teńge, 18 bettik dápter – 47 teńgeden tur. Al dápterdiń tysynyń 10 danasyn – 190 tg-ge ala alasyz. Túrli-tústi qaǵaz -16 paraqtan turatyn túrli-tústi qaǵazdardy 455, al 8 tústi qatty qaǵaz 380 teńge.
Foto: Balalar dúkeniniń skrinshoty
Qalamdar naryqta túrli-túrli bolyp keledi. Olardyń qarapaiym eshqandai sándelmegeni de (150tg), ádemi sýrettermen árlengeni de, syiasy óshetinderi (qoraby shamamen 3000 tg), avtomatty shariktisi de (3 qalam 700-1000 tg) bar. Al túrli-tústi qaryndash 300 teńgeden 3000 teńgede deiin qaltaǵa qarai ár túrlisin tabýǵa bolady. Óshirgish, syzǵysh, qaishy, jelim 500 teńgeden bastap, 3000 teńgege deiin ár túrlisin satyp alýǵa bolady.
Bizdiń esepteýimiz boiynsha bir balany mektepke daiarlaý úshin bir adamnyń ortasha jalaqy mólsheri ketedi.
Elde «Jalpyǵa mindetti bilim berý» qory jumys isteitinin de aita ketken jón. Turmystyq jaǵdaiyna bailanysty qordan beriletin kómekke mektep formasy men sporttyq kiim, aiaq kiimmen qamtamasyz etý, jaǵdaiy tómen otbasylarǵa qystyq kiim, mektepke qajetti qural-saimandar, oqý quraldary (dápter, qalamsap, t.b.) da usynylady.
QR Bilim ministrligi balalardyń quqyqtaryn qorǵaý komitetiniń tóraǵasy Nasymjan Ospanovanyń aitýynsha Ataýly áleýmettik kómek alatyn otbasylardan shyqqan, jetim jáne ata-anasynyń qamqorlyǵynsyz qalǵan, sondai-aq jan basyna shaqqandaǵy ortasha tabysy eń tómengi kúnkóris deńgeiinen tómen otbasylardan shyqqan balalarǵa materialdyq qoldaý kórsetiledi. Sonymen qatar, jańa oqý jyly qarsańynda tótenshe jaǵdaiǵa tap bolǵan oqýshylar qarjylai kómek alady.
"Biylǵy jyly materialdyq kómektiń mólsheri - 43 407 teńgeni quraidy. Búgingi tańda ata-analardyń shottaryna 3,4 mlrd teńgeden astam qarajat aýdaryldy, 78 myńǵa jýyq bala qamtyldy", -dedi Nasymjan Ospanov 1 tamyzda ótken brifingte .
