Atyshýly videodaǵy kórpemen balany tunshyqtyrǵan tárbieshi kinásin moiyndady. Ol tergeýshilerge qyzdy osylai uiyqtatpaq bolǵanyn aitqan, dep habarlaidy Sputnik.
Qaraǵandy oblysy ishki ister departamentindegiler tergeýdiń qalai júrip jatqanyn aityp berdi. Videodaǵy áiel Temirtaýdaǵy balabaqshalardyń birinde shyn máninde tárbieshi bolyp jumys isteidi. Videony ekinshi tárbieshi biyl mamyr aiynda túsirgen eken, biraq tek qazir ǵana jariialap otyr.
"Videodaǵy áiel — balabaqshalardyń birinde jumys isteitin 50 jastaǵy tárbieshi, — deidi oblystyq ishki ister departamentiniń baspasóz hatshysy Baqytjan Qudiiarov, — Ol balany uiyqtata almaǵanyn, qyzdyń ony tyńdamai, tósektiń ústinde sekirgenin aitady. Sondyqtan áiel balany kórpeniń astyna tyǵyp, solai biraz ýaqyt ustap turǵan. Qyzdyń ata-anasy da tabyldy, olar tárbieshiniń ústinen aryz túsirdi".
Sotqa deiingi tergeý 140-bap "Kámelettik jasqa tolmaǵan balany tárbieleý mindetterin oryndamaý" boiynsha júrip jatyr. Áieldi qandai jaza kútip turǵany ázirge belgisiz.
Bul qylmystyq bap boiynsha bas bostandyǵynan aiyrý qarastyrylmaǵan.
