Foto: elements.envato.com
Májilis otyrysynda Ulttyq qordy eki bólikke bólý usynyldy, - dep habarlaidy Tengrinews.kz agenttigi.
Májilis depýtaty Amanjan Jamalov bastama kóterdi. Ol Memleket basshysynyń Ulttyq qor tabysynyń 50 paiyzyn jas qazaqstandyqtarǵa baǵyttaý týraly usynysy halyqtyń úlken qoldaýyna ie bolǵanyn atap ótti.
Sonymen qatar, ol Ulttyq qor qarajatyn respýblikalyq biýdjet tapshylyǵyn jabý úshin jáne túrli memlekettik baǵdarlamalarǵa paidalaný "investitsiialyq kiristi ulǵaitý saiasatyna qaishy keletinin" aitty.
"Ulttyq qordan aqsha ala otyryp, Úkimet Prezident Joldaýynda aitylǵan balalarǵa arnalǵan investitsiialyq tabysty qysqartady. Sondyqtan Ulttyq qordy eki qorǵa bólý yqtimal nusqa bolýy múmkin. Birinshisi - "rezerv qory", ony biýdjet qajettiligin qarjylandyrý úshin paidalanýǵa bolady.
Ekinshisi - "Balalarǵa Ulttyq qor". Oǵan Ulttyq qor aktivteriniń 50 paiyzy beriledi jáne árbir bala úshin arnaiy shottar ashylady, olarǵa barlyq investitsiialyq kiris bólinedi. Búginde Ulttyq qorǵa túsetin barlyq Munai kirisi osy qorlar arasynda teń bólinedi", - dedi Májilis otyrysynda depýtat Jamalov.
Sonymen qatar, depýtat kez kelgen investitsiialyq tabys turaqsyz ekenin atap ótti.
"2001 jyldan bastap ulttyq qorymyzdyń ortasha kirisi jyldyq 3,7 paiyz bolǵan. Biraq Ulttyq qordyń shyǵynǵa ushyraǵanyna keminde 5 jyl boldy, bul - 2002, 2008, 2014, 2015, 2018 jyldar. Ulttyq qordyń aktivterin investitsiialyq basqarý úshin tiimdilik pen jaýapkershilikti arttyrý qajet.
Ol úshin Úkimet pen Ulttyq bank balalarǵa arnalǵan Ulttyq qordyń aktivterin bólý kezinde ártaraptandyrý jáne táýekeldi azaitý talaptaryn belgileitin normativtik quqyqtyq aktiler ázirleýi qajet. Bul normativtik quqyqtyq aktilerde osy Qordyń aktivteri esebinen satyp alynatyn qarjy quraldarynyń tizbesi, sondai-aq, ázirlengen jáne bekitilgen investitsiialyq deklaratsiia bolýy tiis", - dedi Jamalov.
Aita keteiik, Prezident Joldaýynda balalar kámelet jasyna tolǵanǵa deiin Ulttyq qordyń jyl saiynǵy investitsiialyq tabysynyń 50 paiyzyn arnaiy jinaqtaýshy shottarǵa aýdarý bastamasyn usynǵan bolatyn. Jinaqtalǵan soma turǵyn úi satyp alýǵa jáne bilim alýǵa baǵyttalady.
