Balalarǵa qosymsha bilim berýdiń biryńǵai veb-portalyn ázirleý qajet. Bul týraly QR Premer-Ministriniń orynbasary Eraly Toǵjanov aitty, dep habarlaidy QazAqparat.
«Bilim jáne ǵylym ministrligimen birge balalarǵa qosymsha bilim berýdiń biryńǵai veb-portalyn ázirleý máselesin de pysyqtaý qajet dep oilaimyn. Biryńǵai veb-portal sektsiialar men úiirmelerge baratyn balalardyń statistikasyn júrgizýge, memlekettik qarajattyń jumsalýyn qadaǵalaýǵa jáne ata-analar úshin tiisti sektsiialarǵa ótinim berýge óte yńǵaily dep oilaimyn. Bul jerde de másele az emes. Buǵan kei jerlerde azamattardyń qarsy shyǵyp jatqanyn da bilemin. Nege deseńizder, ol óte yńǵaily. Eshkim balalar qai jerde shuǵyldanyp jatqanyna, bapkerdiń biliktiligi kele me, kelmei me jaýap bermeidi. Bir sózden aitqanda, ol jerdegi azamattardyń naqty jaýapkershiligin belgileý kerek. Berilgen qarjynyń naqty, nátijeli uiymdastyrylýynyń ózi tikelei aldymyzda turǵan mindet», - dedi vitse-premer Mádeniet jáne sport ministrliginiń alqa otyrysynda.
Osy rette Eraly Toǵjanov Mádeniet jáne sport ministrligine memlekettik sporttyq tapsyrysty Bilim jáne ǵylym ministrliginiń qosymsha bilim berý júiesimen yqpaldastyrýdy tapsyrdy.
«Ońai jumys emes. Biraq, osyny uiymdastyrýymyz kerek. Árbir bala qaida baratynyn bilýi kerek. Bala úiirmege búgin barǵanymen bir aidan keiin ainyp, basqa jerge baramyn deýi múmkin. Jarty jyldan keiin oiy taǵy ózgerýi múmkin. Negizgi maqsat bólinetin aqshanyń balanyń sońyna júrýi tiis. Onyń esebi bolýy qajet», - dedi Úkimet basshysynyń orynbasary.
