Foto:abai.kz
Biyl balalarǵa arnalǵan qazaq tildi 37 jańa animatsiialyq film túsirý josparlanyp otyr. Bul maqsatqa biýdjetten 500 million teńge qarastyrylǵan. Maqsaty – jas urpaqty patriotizmge, mádeni jáne rýhani qundylyqtarǵa tárbieleý jáne ulttyq dástúrlerdi saqtaýǵa baǵyttalǵan. Al 2019-2022 jyldary memlekettiń qoldaýymen 8 animatsiialyq mýltfilm jaryq kórdi.
Degenmen qazaq tilindegi mýltfilmder áli de óte az, al YouTube siiaqty qoljetimdi platformalarda múlde joqtyń qasy. Búgingi kúni bul úlken másele, óitkeni balalar teledidardan góri internet pen YouTube-ty kóbirek tańdaidy. Sondyqtan balalar sheteldiń mýltfilmderimen shektelmei, sapaly ári qyzyqty qazaqsha týyndylardy kórýi tiis.
Osy maqsatta, kelesi jyly qazaq tilindegi mýltfilmder jasaýǵa 350 million teńge bólý josparlanyp otyr. Ol tek teledidarǵa emes, mindetti túrde internetke, sonyń ishinde YouTube-qa júktelýi de eskeriletin bolady. Bul týraly májilis depýtaty Ashat Aimaǵambetov málimdedi.
«Bul balalardyń qazaq tilinde qyzyqty kontentke qol jetkizý múmkindigin keńeitedi dep senemiz», - dep jazdy ol óziniń resmi paraqshasynda.
Jalpy, qazaq tildi kontent qarqyndy damyp kele jatyr. «Ulttyq kinony qoldaý memlekettik ortalyǵy» biyl sheteldik 15 filmdi qazaqshaǵa aýdarýdy josparlap otyr. Al sheteldik kompaniialar bizdiń ana tilimizdi qoldaýda shet qalyp otyrǵan joq. Mysaly biyl álemdik prokatqa shyqqan «Oijumbaq-2» mýltfilmi qazaqsha aýdarylyp, kishkentai kórermender nazaryna usynyldy. Paidaly, tanymdy, ómirlik qundylyqtardy nasihattaityn atalmysh týyndy qazaq tilinde 125 mln teńge kassa jinady. Qazaq tilindegi dýbliajdy Disney kompaniiasy qoldaǵan. Al «Venom. Sońǵy bi» fantastikalyq týyndysyn «Qazaq tili» qoǵamynyń usynysymen Sony Pictures óz qarajatyna aýdaryp, dýbliajdady. Osylaisha biylǵy álemdik premeralardyń qazaq tilindegi aýdarmasy buryn-sońdy bolmaǵan rekordtyq kórsetkishterge jetip otyr. Bul úlken jaqsylyqtyń nyshany.
Elimizde balalarǵa qazaq tilinde bilim beretin jáne tanymdyq kontent usynatyn onlain kinoteatrlar men platformalar da bar.
Mysaly “ÖZINŞE” platformasy túrli jastaǵy balalar men jasóspirimderge qazaq tilindegi mýltfilmder, filmder jáne serialdardy usynady. Bul qosymshany AppStore jáne GooglePlay arqyly júkteýge bolady.
Balapan telearnasy – otandyq memlekettik balalar arnasy. Telearna qazaq tilinde tanymdyq jáne tárbielik mýltfilmderdi kórsetedi.
Nickelodeon jáne TiJi arnalary – Qazaqstanda qazaq tiline aýdarylǵan tanymal sheteldik mýltfilmderdi usynatyn arnalar. Bul arnalarǵa memleket 800 saǵattan astam qazaq tilindegi animatsiialyq kontentti qosqan. Sonymen qatar, TiJi men Nickelodeon mektep jasyna deiingi balalarǵa arnalǵan mazmundy, sonyń ishinde ánder men áńgimelerdi qazaq tiline aýdarýmen de ainalysady.
Taǵy bir jaǵymdy jańalyq. Qazaq animatsiiasy halyqaralyq deńgeide tanymal bolýǵa niettenip otyr. Ol úshin Netflix jáne basqa da platformalarda kórsetilý múmkindikterin ashý jumystary júrgizilýde. “Qaravan Istorii” jáne “Altyn Adam” siiaqty jobalar qazaq mádenietin, ulttyq muralardy jáne tarihty qamtidy, bul da qazaq animatsiiasynyń damýyn yntalandyrýda.
