Balalar qatysatyn kez kelgen is-sharany uiymdastyrý olardyń qaýipsizdigine kepildik berýi tiis. Bul týraly QR Premer-Ministri Álihan Smaiylov aitty, dep habarlaidy QazAqparat.
«Balalardyń bilim alyp, jan-jaqty damýyna, demalysy men meditsinalyq qyzmet alýyna jaǵdai jasaý – memlekettiń mańyzdy mindeti. Biz júzdegen mektep, bala-baqsha men mádeni jáne sport nysandaryn salyp jatyrmyz. Munyń barlyǵy balalardyń tolyqqandy damýy úshin qajet.
Sondai-aq Balalar jyly aiasynda biyl kóptegen keshendi is-shara josparlanyp otyr. Búgin Almatyda Memleket basshysy Balalar jylynyń qurmetine shyǵarmashylyq, ziiatkerlik jáne sporttyq baiqaýlardyń jeńimpazdary men laýreattary 30 myń oqýshynyń qatysýymen «Almaty – fest» festivalin ashady. Barlyq óńirde balalarǵa arnalǵan merekelik is-sharalar bastalady», - dedi Úkimet basshysy.
Álihan Smaiylov Balalar jylynyń barlyq is-sharalary naqty oryndalýy tiistigin basa aitty.
«Balalardy qorǵaý kúni qashan da jazǵy saýyqtyrý naýqanynyń bastamasy bolǵan. Ol úshin Densaýlyq saqtaý ministrligi qolaily jaz mezgilin barynsha tiimdi paidalanyp, keshendi sharalardy qabyldaý kerek. Balalardyń jazǵy demalysy men bos ýaqytyn tiimdi uiymdastyrý kezinde kóptegen mańyzdy jáne negizgi jaittardy eskerý qajet. Eń bastysy – kóshede, sýda demalý kezinde, túrli ekskýrsiialarda balalarymyzdyń qaýipsizdigin qamtamasyz etý qajet», - dedi ol.
Premer-Ministrdiń atap ótýinshe, balalar qatysatyn kez kelgen is-sharany uiymdastyrý, eń aldymen, olardyń qaýipsizdigine kepildik berýi tiis.
«Ishki ister, Bilim jáne Densaýlyq saqtaý ministrlikteri, óńir ákimderi tiisti qyzmetterdiń jumysyn osyǵan jumyldyrýy kerek. Sonymen birge oqý oryndaryn qaýipsizdik júiesimen jaraqtandyrý jáne jańǵyrtý jumystaryn jandandyrý qajet», - dedi Álihan Smaiylov.
