Ádebietti ardyń isi sanaityn bizdiń qazaq kitapty rýhani qazynamyz deidi. Kitap oqyǵan adamnyń oi tanymy artyp, sózdik qory kóbeiip, bilimi ushtalady. Al siz kitap oqisyz ba? Uialy telefonǵa úńilgen balańyzdy kitapqa qalai úiretesiz? «Balapan uiada kórgenin iledi» degendei, siz oqysańyz, ol da kitap oqyr, bálkim. Mine, osyndai saýaldar qazir kópshiliktiń kókeiinde júr. «Ult portaly» búgin shalǵaidaǵy kitaphanashylardyń oi-pikirin usynady.
Aigúl Taspoltaeva, Qazyǵurt aýdandyq balalar kitaphanasynyń meńgerýshisi:
«Balalar ádebieti burynǵy klassiktermen ǵana shektelip qaldy. Sońǵy kezde shyqqan kúnniń ózinde bizge shalǵaiǵa jetpei jatady. Qazirgi kezde kóptegen jas aqyndar, jas jazýshylar jazyp jatyr. Biraq baspalardan shyǵyp, bizge jetpei jatyr. Bizdiń balalar kitaphanasy qoryna kóptegen kitaptar kelip jatyr. Biraq kóbinese, Garri Potter siiaqty fantastikalyq shetel aýdarmalary, orysshanyń aýdarmalary keledi. Olar sýretti, kórkemdi, balany oqýǵa tez beiimdeidi. Byltyr biyl jazýshylarǵa kóp júk artylatyn siiaqty. Óitkeni shaǵyn áńgimelerdi, shaǵyn romandardy úzip alyp, sony balaǵa laiyqtap, kórkemdep, syrtqy muqabasyn ádemi qyp bezendirse, oqymaityn bala joq. Kitapty bala da, ata ana da oqidy. Ata-ana oqysa, bala da sol úrdisti ózine alady, boiyna sińdiredi. Balany kitap oqýǵa jastaiynan tárbieleýimiz kerek. úsh jastan bastap, kitap oqymasa da daýystap oqý arqyly onyń sanasyna sińdirýimiz kerek.
Biz balalar arasynda ertegi jazý baiqaýyn uiymdastyrdyq. Sonda balalardyń kóbi teledidardan kórgen ertegilerin jazyp keldi. Óziniń qiialynan týyndatyp jazǵan biren saran ǵana bar. Balanyń qiialy ushqyr. Bala barlyq nárseni qabyldaidy. Qiial arqyly óz oiyn qaǵaz betine túsirgender de bar.
Jazýmen ainalysatyn úlken jazýshylar, balalar ádebietine den qoiǵandar balalardyń sana sezimine, oiyna erekshe áser etetin týyndylar jazyp, ony sýretshiler kórkem bezendirip, kitaphanalarǵa tússe eken deimiz. Shalǵai mekenderde, aýyldy jerlerde kitap jetpei de jatyr. Osy máseleni eskerýimiz kerek siiaqty».
Ǵaliia Maimaqova, Sozaq aýdandyq balalar kitaphanasynyń meńgerýshisi:
«Balalar birinshi ertegini izdeidi. Qazir ertegilerdi býyndap, kórsem sýrettep shyǵaryp jatyr. Bul da utymdy. Sol arqyly bala da sýretine qarap, býyndap oqyǵandy jaqsy kóredi. Bizde balalar kitaphanasynda otbasylyq oqý úrdisi qalyptasqan. Bizde ata-analar balalaryn, nemerelerin ákelip, ertegi kitaptar suraidy. Ózderi de jatar aldynda balaǵa oqyp bergendi qup kóredi. Sondyqtan bul úrdis aýyldy jerlerde jaqsy qalyptasqan dep aita alamyn. Balalar kitaptaryna suranys óte joǵary.
Biz «Altyn saqany», qazaq ertegilerin oqyp óstik. Qazirgi zamannyń talabyna sai búgingi oqyrman, búgingi balalar «órmekshi adam», «temir adam», «terminator» siiaqty mýltfilmderdi kórip ósken. Tipti jańa jyldyq keshterde solardyń kostiýmderin kiedi. Al buryn aiý, mysyq, tyshqan siiaqty keiipkerlerdi kiiýshi edi. Mine, ýaqyttyń balalardy qalai ózgertkenin osydan baiqaýymyzǵa bolady. Demek oi sana ózgerip jatyr. Al balalardyń oi sanasymen jumys isteitin biz kitaphanashylar, ata analar, ustazdar, aqyn jazýshylar ekenimizdi umytpaiymyz kerek».
Janat Shardarbekova, Y.Altynsarin atyndaǵy Túrkistan oblystyq kitaphanasy direktorynyń orynbasary
«Jalpy balalar ádebietiniń jaǵdaiy búgingi tańda kisi qýantarlyqtai jaǵdaida emes. Óte aqsap tur desek artyq aitqandyq emes. Balalar ádebietinde qanshalyqty ózgeris bolady, áli belgisiz... balalar ádebietimen ainalysatyn qalamgerlerimiz de óte az. Negizinde balalar ádebieti janr óte qiyn. Kitapty qolyna alǵan balany sol oqiǵaǵa sendirý, ertegige sendirý óte qiyn. Marhabbat Baiǵut aǵamyz «balalar ádebietimen ainalysý úlken qalamgerlerge ońai emes» dep beker aitpaidy ǵoi. Ertegi jazyp shyǵý bir kitapty jazyp shyqqannan da qiyn. Jalpy balanyń psihologiiasyna ádebiet arqyly áser etý ońai emes».
P.S: Psihologtardyń sózine súiensek, atys-shabys kórip ósip, uialy telefonnan bas kótermeitin balanyń minez-qulqy men oi-tanymy ózgeredi. Balanyń densaýlyǵyn aitpaǵanda, júrekti qattylyq jeńedi. Al balany osy bir qaýipten alyp shyǵý úshin balalar jazýshylaryna artylar salmaq zil batpan.
