Qazaqstanda balalardyń arnaiy meditsinalyq-áleýmettik mekemeleriniń jumysy aldaǵy eki aptada tolyq tekserilip bolady.
Bul týraly Eńbek jáne halyqty áleýmettik qorǵaý vitse- ministri Erlan Áýkenov málim etti, dep habarlaidy QazAqparat.
«Qazirgi ýaqytta QR Bala quqyqtary jónindegi ýákildiń, basqa da jaýapty memlekettik organ ókilderiniń qatysýymen balalardyń arnaiy meditsinalyq-áleýmettik mekemeleriniń jumysy tekserilip jatyr. Naqtyraq aitqanda ol ortalyqtardaǵy zańnamanyń saqtalýy qatań qadaǵalanady. Búginge, iaǵni 20 qarashaǵa deiin balalardyń arnaiy meditsinalyq-áleýmettik mekemeleriniń 20-nyń 18-in tekserdik. Atap aitqanda eń birinshi tekserý jumystaryn shý shyqqan Aiagóz aýdanynan bastadyq. Aldaǵy eki aptanyń ishinde bul tekserý jumystaryn aiaqtaimyz. Monitoring toptarynyń jumysyn qorytyndysy boiynsha jinaqtalǵan aqparatty halyqqa taratamyz», - dedi Erlan Áýkenov «Balalyq shaqty qorǵaý júiesiniń tiimdiligi jáne balanyń ál-aýqaty: memleket pen azamattyq qoǵamnyń birigýi» taqyrybynda baspasóz máslihatynda.
Eske sala ketsek baspasóz máslihatynda QR Bala quqyqtary jónindegi ýákil Arýjan Sain balalardyń shyǵarmashylyq jáne sporttyq úiirmeleriniń tegin bolýyn shektep turǵan kedergilerdi ataǵan edi.
