Áleýmettik jelide Atyraý qalasyndaǵy №3 arnaiy áleýmettik qyzmet kórsetý ortalyǵynda túsirilgen video tarap ketti. Politsiia eki adamǵa qatysty qylmystyq is qozǵady, dep habarlady Sputnik agenttigi Aq Jaiyq portalyna silteme jasap.
Ortalyq psihologiialyq-nevrologiialyq aýytqýy bar balalardyń mektep-internaty retinde qurylǵan. Osy mekemeniń burynǵy qyzmetkeri Ulbike Bisekenova mamandardyń kishkentai balalarǵa qalai qaraitynyn videoǵa túsirip, jelige salyp jiberdi. Rolikten eki balany ýnitazdyń tutqasyna tósek jaimamen bailap tastaǵanyn anyq kórýge bolady.
"Myna balanyń bet-aýzyn qarańyz. Masqara!", - deidi ol.
Al kelesi kadrda qyz bala sińiri tartylyp qalǵan adam sekildi jerde jatyr. Al videoǵa túsirip turǵan adam jaqyndap barǵanda basyn kóterip qaraidy.
"Mine, jerde jatyr, eshkim kómektesip jatqan joq. Medbike qaramaidy da. Eshkim alǵashqy kómek bere almai otyr", - deidi avtor.
Osy kezde aq halat kigen kisi kelip: "Elmira, turshy", - dep, jerde jatqan qyzdy turǵyzady.
Budan bólek, Bisekenova shelek ustap bara jatqan er adamdy túsirip, burynǵy áriptesteri urlyq jasaitynyn aitqan.
Politsiia departamenti internattyń eki qyzmetkerine qatysty Qylmystyq kodekstiń 110-baby (Qinaý) boiynsha sotqa deiingi tergeýdi bastady.
"Balalardyń denesinde jaraqat izderi anyqtalǵan joq. Tergeý jalǵasyp jatyr", - deidi politseiler.
Sondai-aq jelide taraǵan videonyń sáýir aiynda túsirilgeni anyqtalyp otyr. Biraq beinejazba oblystyq áleýmettik baǵdarlamalar men jumyspen qamtýdy úilestirý basqarmasyna shilde aiynda túsken.
Basqarma basshysynyń orynbasary Alfiia Tóleǵarievanyń aitýynsha, jaqynda prokýratýra men kámelettik jasqa tolmaǵandardyń isteri jónindegi komissiia ortalyqta tekseris júrgizdi. Biraq tártip buzý faktileri anyqtalǵan joq. Al video avtory múlikti urlaǵany úshin aiyptalǵan. Sodan istiń mán-jaiy anyqtalǵansha jumystan shettetilgen.
Aita keteri, 2019 jyly beinebaqylaý júiesi arqyly ortalyq qyzmetkerleriniń balalardy urǵany anyqtalǵan bolatyn. Sol kezde eki sanitardyń úsh jarym jylǵa bas bostandyǵy shekteldi.
