Foto: Pexels
Ishki ister minitsrligi 22-24 mamyr aralyǵynda «STOP-trafik» jedel aldyn alý sharasyn ótkizdi. Onyń barysynda adam saýdasynyń 49 faktisi, onyń ishinde kámeletke tolmaǵandarǵa qatysty toǵyz fakt anyqtaldy, dep habarlaidy "Ult aqparat" Polisia.kz saityna silteme jasap.
Adamdar «trafigimen» bailanysty zańǵa qaishy áreketterdi júzege asyrǵan kúdiktilerge qatysty uiymdasqan qylmystyq top qurý jáne oǵan basshylyq etý derekteri boiynsha úsh tergeý bastaldy.
Mysaly, Astana qalasynda toǵyz «elitalyq» monsha kesheniniń aýmaǵynda jas qyzdardy seksýaldyq qanaý jáne májbúrleý boiynsha qylmystyq júieni jolǵa qoiǵan 17 adamnan turatyn toptyń qylmystyq áreketiniń joly kesildi.
30-dan astam tintý kezinde aqsha jáne alty avtokólik tárkilendi. Negizgi figýranttar qamaýǵa alyndy.
Shymkent qalasynda osyǵan uqsas uiymdasqan qylmystyq top áshkerelendi. Munda jalpy somasy 1 mln teńge jáne 16 myń AQSh dollarynan astam qarajat, 10 avtokólik tárkilendi.
Top jetekshileri men músheleri qamaýǵa alyndy.
"Petropavl qalasynda 2023 jyldan bastap zorlyq-zombylyq pen bopsalaý arqyly jas qyzdardy jynystyq qanaýǵa májbúrlep kelgen qylmystyq top áreket etken. Uiymdasqan qylmystyq top qurý, basqarý jáne oǵan qatysý deregi boiynsha qylmystyq is tergelýde", — dedi IIM uiymdasqan qylmysqa qarsy kúres departamentiniń ókili Qýandyq Alpys.
Birqatar óńirde áleýmettik osal toptardan shyqqan adamdardy qaiyr suraýǵa májbúrleý faktileri anyqtaldy.
"Qaraǵandy qalasynda múmkindigi shekteýli jandarǵa qoqan-loqqy jáne kúsh kórsetip, olardy qaiyr suraýǵa májbúrlep, «biznes» uiymdastyrǵan adamdar toby ustaldy. Qylmyskerler óz qurbandarynyń esebinen jylyna 10 mln teńgege deiin tabys taýyp otyrǵan. Osyǵan uqsas qylmystyq toptardyń áreketteri Aqtóbe, Almaty jáne Mańǵystaý oblystarynyń aýmaǵynda áshkerelendi. Onda múgedekter men jas balalardy bazarlar men vokzaldar aýmaǵynda paidalanǵan. Barlyq qylmyskerler quryqtaldy. Bul baǵyttaǵy jumys júieli túrde júrgiziledi", — dedi Qýandyq Alpys.
