Qurylys brigadalary órt saldarynan qiraǵan oblystyq balalar úiiniń ǵimaratyn jóndeý jumystaryn bastap ketti. Bul týraly kaz.tengrinews.kz tilshisine Almaty oblystyq bilim basqarmasynyń basshysy Lázzat Bazarqulova habarlady.
"Oblystyq balalar úii 280 oryndyq. Órt kezinde 154 tárbielenýshi ishte bolǵan. almaty qalalyq TJD men personal qyzmetkerleriniń der kezinde jasaǵan áreketteriniń arqasynda balalar evakýatsiialandy. Balalar úiiniń ǵimaraty eki blokqa bólingen - bireýi úsh qabatty, ekinshisi tórt qabatty. Órt úsh qabatty ǵimarattan shyqty. Qazir balalar tórt qabatty blokta. Jumys shtat tártibinde júrip jatyr", - dedi Bazarqulova.
Sonymen qatar, bilim basqarmasynyń basshysy órt kezinde jaraqat alǵandar jaily málimet berdi. "Evakýatsiia kezinde tórt bala jaraqat aldy, olar №1 qalalyq aýrýhanaǵa jetkizildi. Olardyń biriniń qabyrǵasy synǵan. Úsheýi erteń aýrýhanadan shyǵarylady", - dedi basshy.
Alaida balalar úiiniń jumysshysy zardap shekti degen qaýeset joqqa shyǵaryldy. "Balalar úiinde qaita qalpyna keltirý jumystary bastaldy. Ony "Dáýlet Serpin" JShS júrgizip jatyr. Jumysshylar ǵimaratty tazalap, qurylys-montaj jumystaryna kirisedi", - dedi Bazarqulova.
Eske salaiyq, keshe túnde Baǵanashylda balalar úiinde alapat órt shyqqan bolatyn. Órt sóndirý kezinde 161 bala men personaldyń 12 qyzmetkeri evakýatsiialandy.
