Foto: Biz birgemiz volonterler shtaby
Qazaqstandaǵy Bala quqyqtary jónindegi ýákil Dinara Zakieva 10 tamyzda Almatydaǵy Ortalyq stadionda ótken amerikalyq pop-juldyz Djennifer Lopestiń kontsertine jasóspirimderdi volonter retinde tartý máselesine qatysty pikir bildirdi, dep habarlaidy Ult.kz.
«Almatydaǵy kontsertke kámeletke tolmaǵandardy volonter retinde tartý máselesi boiynsha Bala quqyqtaryn qorǵaý komitetine jáne ýákiletti organdarǵa barlyq mán-jaidy zerttep, tiisti sharalar qabyldaý úshin ótinish joldadym», – dep jazdy ol Instagram jelisindegi storisinde.
Buǵan deiin kámeletke tolmaǵan volonterler kontsert uiymdastyrýshylaryna keshki ýaqytta úige jetý úshin kólik uiymdastyrylmaǵanyn (zań boiynsha bul ýaqytta balalardyń kóshede júrýine bolmaidy), nusqaýlyqtyń durys berilmegenin jáne tamaqtyń ýaqytyly jetkizilmegenin aityp shaǵymdanǵan.
Eńbek kodeksiniń 69-babyna sáikes, kámeletke tolmaǵandardy túngi ýaqytta (22:00-den 06:00-ge deiin), qosymsha jumysqa, vahtalyq ádispen, qosa atqarý tártibimen nemese jiyntyq jumys ýaqyty esebimen jumysqa tartýǵa tyiym salynady. Sondai-aq, olarmen eńbek shartyn jasasý úshin ata-ananyń nemese zańdy ókildiń jazbasha kelisimi qajet. Bala quqyqtaryn qorǵaý komitetiniń tóraiymy Nasymjan Ospanova:
«Balalar eńbegin zańsyz paidalaný – jumys berýshiler úshin ákimshilik jáne qylmystyq jaýapkershilikke ákeletin aýyr quqyqbuzýshylyq, sondai-aq ol balanyń densaýlyǵyna orny tolmas ziian keltirýi múmkin», – dep atap ótti.
Al "Biz birgemiz" volonterler shtaby taratylǵan aqparatty joqqa shyǵaryp, resmi túsinikteme berdi. Olardyń málimdeýinshe, is-sharaǵa kómek kórsetý úshin 6 myńnan astam adamnan ótinim qabyldanyp, irikteý nátijesinde 300 volonter shaqyrylǵan. Bir apta buryn olardyń barlyǵyna qatysý sharttary túsindirilip, nusqaýlyq júrgizilgen. Kontsert kúni volonterlerdi «Salam Bro» kafeler jelisi tegin tamaq jáne sýsyndarmen qamtamasyz etken. Tamaq aýysymǵa bailanysty kúni boiy berilgen, sondai-aq demalýǵa arnalǵan ýaqyt pen arnaiy aimaq qarastyrylǵan.
Uiymdastyrýshylardyń aitýynsha, kontsert 19:00-de bastalyp, 21:00-de aiaqtalýy josparlanǵandyqtan, kámeletke tolmaǵandardy jetkizý boiynsha transfer qarastyrylmaǵan. Sebebi Almatyda qoǵamdyq kólik 23:00-ge deiin qatynaidy. Sonymen qatar, stadion aýmaǵynda aýyz sý jáne jeke zattardy saqtaityn oryn uiymdastyrylǵan. Volonterler óz qalaýy boiynsha jumys ýaqytyn tańdap, qajet bolǵan jaǵdaida bir-birin almastyrǵan. Kontsertten keiingi aýmaqty tazalaý da tek erikti negizde júrgizilgen.
«Volonterlik – ár adamnyń erikti tańdaýy jáne azamattyq belsendiliginiń kórinisi. Biz olardyń eńbegin joǵary baǵalaimyz. Osyndai bastamalar qoǵamdy birlikke jáne qamqorlyqqa jeteleidi», – dep málimdedi uiymdastyrýshylar.
Aita keteiik, Djennifer Lopestiń kontsertinde volonter bolǵan bir qyz uiymdastyrýshylardyń zańdy óreskel buzǵanyn aitqan. Volonterler tańǵy saǵat 11-den túngi saǵat 23:00-ge deiin qyzmet etken.
"Erejege sáikes, tamaq pen sýsyn ákelýge tyiym salyndy. Volonterlerge sý berildi, al tamaqty tek keshki saǵat jetiler shamasynda ǵana usyndy! Barlyq ýaqyt boiy volonterler 35 gradýs ystyqta oryndarynda kezekshisiz, demalys pen túski úzilissiz turdy. Kontsert bitken soń, túngi 22:30-da kámeletke tolmaǵan balalardy stadiondy jinaýǵa qaldyrdy. Iaǵni, tańǵy 11-den túngi 23-24-ke deiin volonterler 12 saǵattan artyq úzilissiz jumys istedi. Al kontserttiń syrtqy perimetrinde jumys istegender múlde kontsertti kórmedi", - dep jazady ashynǵan qala turǵyny.
Belgili bolǵandai, bul jumys úshin olarǵa tek alǵys hat berýge ýáde etilgen.
"Sonymen qatar, erterek ketýge nemese suhbat berýge qatań tyiym salyndy, áitpese "qara tizimge" engizemiz dep qorqytty. Aita keteiin, mundai "únsiz ári tegin jumys kúshin paidalaný" qaladaǵy barlyq iri is-sharada turaqty túrde bolyp turady. Balalardyń quqyǵy buzylyp jatyr, al uiymdastyrýshylar personal jaldaýda aitarlyqtai únemdeidi", - delingen Threads jelisindegi jazbada.
