1 maýsym – Halyqaralyq balalardy qorǵaý kúnine orai 18 jasqa deiingi balalary bar otbasylarǵa «Kaspi gold» mobildi qosymshasyndaǵy áleýmettik shot arqyly birjolǵy járdemaqy tólenetini týraly messendjerler men áleýmettik jelilerde tarap jatqan aqparat shyndyqqa janaspaidy, dep habarlaidy "Ult aqparat" Eńbek jáne halyqtyń áleýmettik qorǵaý ministrligine silteme jasap.
"Esterińizge sala keteiik, «Kaspi gold» qosymshasynda respýblikalyq biýdjetten bala týǵanda beriletin birjolǵy járdemaqyny resimdeý boiynsha memlekettik qyzmet júzege asyrylǵan. Birinshi, ekinshi, úshinshi bala týǵanda beriletin járdemaqy mólsheri 116 394 teńgeni (38 AEK), tórtinshi jáne odan keiingi balaǵa – 192 969 teńgeni (63 AEK) quraidy. 1 mamyrdaǵy jaǵdai boiynsha bul járdemaqyny 18,4 mlrd teńge somasyna 134,1 myń adam aldy.
Sondai-aq joǵaryda kórsetilgen qosymsha arqyly azamattar respýblikalyq biýdjetten jumys istemeitin áielder úshin bir jasqa deiingi bala kútimi boiynsha járdemaqy resimdei alady. Járdemaqy mólsheri otbasyndaǵy balalar sanyna bailanysty saralanady. Osy jyly birinshi balaǵa ai saiyn 17 643 teńge (5,76 AEK), ekinshi balaǵa – 20 860 teńge (6,81 AEK), úshinshi balaǵa – 24 045 teńge (7,85 AEK), tórtinshi jáne odan keiingi balaǵa – 27 261 teńge (8,90 AEK) tólenedi. 1 mamyrdaǵy jaǵdai boiynsha bul járdemaqyny orta eseppen 46,5 myń adam 4,7 mlrd teńge somaǵa aldy" - delingen habarlamada.
