Foto: QR Mádeniet jáne aqparat ministrligi
Búgin Astanada «Daryn» memlekettik jastar syilyǵynyń laýreattaryn marapattaý rásimi ótti, dep habarlaidy "Ult aqparat".
Sharaǵa QR Mádeniet jáne aqparat ministri Aida Balaeva, Parlament Májilisiniń depýtattary, qoǵam qairatkerleri men marapat ieleri qatysty.
Ministr óz sózinde «Daryn» jastar úshin eń mańyzdy syilyq ekenin atap ótti.
«Árine, óner-bilim – adamnyń talabynan týsa, onyń ishki tálimi men mádenieti – tulǵanyń ziialy sanasy men ulttyń sapasynan. Sondyqtan da, el Prezidenti Qasym-Jomart Kemeluly Toqaev ziialy, intellektýaldy ult týraly aitqanda, eń aldymen onyń negizin quraýshy – ózderińizdei ónerli de bilimpaz ǵana emes, tereń sanaly, rýhani sapaly jandar týraly aitady.
Memleket basshysynyń sońǵy jyldary júrgizip jatqan aýqymdy reformalary da osyndai jastarymyzdyń erteńi úshin jasalyp jatyr. Bolashaq Qazaqstannyń álemdik arenada shyn máninde órkenietti, ziialy da zaiyrly, ozyq oily bolýynyń birden-bir kepili de osy. Onyń negizinde qarapaiym, biraq óte maǵynaly bes talap jatyr: bilimdilik, eńbekqorlyq, adaldyq, jaýapkershilik jáne kásipqoilyq», - dep atap ótti Aida Balaeva quttyqtaý sózinde.
Ministrdiń aitýynsha, bul syilyq júzdegen qazaqstandyq daryndy jastardyń ómirine jańa bastama berdi. Olardyń qatarynda mádeniet qairatkerleri Dimash Qudaibergen, «Mýz ART» toby, sportshylar Olga Shishigina, Denis Ten, Dinara Sadýaqasova, jas ǵylymdar Maksim Zdorovets, Maqsat Jabagin, jýrnalister Maqpal Jumabai, Irina Ten syndy daryndy tulǵalar bar.
«Bul qasietterdiń barlyǵy «Daryn» syilyǵynyń iegerlerine tán qasietter ǵana emes, ósip kele jatqan jastarǵa úlken ónege. Bir ǵana Dimash Qudaibergenniń mysalynda Otanymyzdy, onyń mádenieti men tilin tórtkúl dúniege pash etip júrgen ónerpazdy ǵana emes, ishki parasaty zor, adami tálimi úlgi, jany meiirban azamatty kóremiz. Sóz joq, bul jastarǵa durys baǵyt kórsetetin ónegeli jol.
Sodan bolar – biyl «Daryn» syilyǵyna tapsyrys bergen jastardyń sany ótken jylǵa qaraǵanda 50% paiyzǵa kóp. Qazylar alqasyna ońai tigen joq. Qyzý talqylaýlar men pikirtalastar boldy. Kil júiriktiń ishinen tańdaý jasaý qashanda qiyn, óitkeni barlyq úmitkerler atalǵan syilyqqa laiyqty», - dedi Aida Balaeva.
Ministr jastardyń jarqyn ókilderi keler urpaqqa úlgi bola otyryp, adal eńbek arqyly salaýatty ómir saltyn nasihattaýǵa, qoǵamdyq mádenietti saqtaýǵa, ózin-ózi damytý men ortada jaǵymdy, oń kózqaras qalyptastyrýǵa uiytqy bolýy tiis dep sanaidy.
"Sońǵy jyldary qolǵa alynǵan Prezidenttiń aýqymdy reformalary, bastamalary men baǵdarlamalary bolashaq urpaq úshin qýatty irgetas sanalady. Bul ister erteńgi qoǵam kedergilerge tap bolmaýy úshin jáne jahandyq missiialarǵa nazar aýdarmaýy úshin qajet. Memleket jastardyń damýy úshin barlyq jaǵdaidy jasaidy, al Prezident árdaiym qoldai otyryp ózin - ózi jetildirýge shaqyrady", - dep atap ótti ministr.
Ministr "Daryn" memlekettik jastar syilyǵynyń 19 laýreatyna diplom, tósbelgi jáne aqshalai syilyqtar tabys etti.
Biyl memlekettik organdar men qoǵamdyq birlestikter 340-tan asa kandidatýra usyndy.
Onyń ishinde "ǵylym" boiynsha 110, "Dizain jáne beineleý óneri" - 21, "Sport" - 27, "Teatr jáne kino" - 49, "Estrada" - 12, "Jýrnalistika" - 10, "Halyq shyǵarmashylyǵy" - 28, "Shyǵarmashylyq bastamalar" - 32, "Ádebiet" - 28, "Klassikalyq mýzyka" boiynsha 30 ótinim bar.
