Sońǵy ýaqytta áleýmettik jeliler men messendjerlerde ata-analarǵa balasyn balabaqshaǵa kezeksiz ornalastyryp berýdi ýáde etetin zańsyz jarnamalar kóbeigen. Alaida Oqý-aǵartý vitse-ministri Shynar Aqparova mundai usynystardyń tolyqtai alaiaqtyq ekenin aityp, halyqty saq bolýǵa shaqyrdy, dep habarlaidy ult.kz.
Májiliste ótken brifingte ol elimizde balabaqshaǵa kezek júiesi tolyq tsifrlandyrylǵanyn atap ótti. Onyń aitýynsha, bul júiege syrttan aralasý nemese kezekti qoldan «jyldamdatý» múmkin emes.
– Balany balabaqshaǵa ornalastyrý tek ata-ananyń óz derekteri arqyly júzege asady. Ótinish JSN men ETsQ arqyly beriledi, sondyqtan bógde adamdardyń aralasýyna jol joq. Mundai zańsyz áreketter úshin jaýapkershilik qarastyrylǵan, – dedi vitse-ministr.
Vedomstvo ókili áleýmettik jelilerde taraǵan «kezeksiz oryn alyp berý» týraly habarlamalarǵa senbeýge shaqyrdy. Onyń aitýynsha, barlyq protsess tek resmi elektrondy platforma arqyly jáne belgilengen kezek tártibimen júrgiziledi.
– Ata-analarǵa aitarymyz – mundai usynystarǵa aldanbańyzdar. Barlyǵy júie boiynsha, óz kezegimen sheshiledi. Ótinishti jeke kabinet arqyly ózderińiz berip, kezekterińizdi kútý qajet, – dedi Shynar Aqparova.
Aita keteiik, elimizde mektepke deiingi bilim berýdi jan basyna shaqqandaǵy vaýcherlik qarjylandyrý boiynsha pilottyq joba 2026 jyldyń 1 shildesine deiin uzartylǵan.
