Túrkistan oblysy Otyrar aýdanynda balabaqshaǵa ketken búldirshin aýyr dene jaraqatymen aýrýhanadan bir-aq shyqty. Bir jastan endi ǵana asqan balany ata-anasy tańǵy saǵat segizde balabaqshanyń tasymal kóligine salyp jibergenin aitady, dep habarlaidy QazAqparat.
Búldirshinniń anasy Ajar Pernebektiń aitýynsha, arada úsh saǵat ótken soń oǵan balabaqshadan jaisyz habar jetken. Tárbieshi balasynyń jai ǵana qulap, jaraqattanyp qalǵanyn aitady. Alaida, balabaqshaǵa barǵan ol ulynyń jambasy synyp, basy men denesi qatty jaraqattanǵanyn kóredi. Baqshadaǵylardyń jedel járdem de shaqyrtpaǵanyna qynjylady. Esesine, jambasy isip, qinalyp turǵan balany emshige aparyp úlgeripti. Bolǵan jait týraly tárbieshiler eki túrli jaýap berip, áldeneni jasyryp otyr deidi.
«Balamnyń aiaǵy mashinada qaiyrylyp, qysylyp qaldy deidi. Sol kezde qulap qalǵanyn aitady. Bizdiń oiymyzsha, onyń aiaǵy rasymen qysylyp qalǵan jáne kólik júrip ketken. Qulaǵan soń kórinbei qalady ǵoi. Júrgizýshi tústi dep oilaǵan da, súiregen biraz jerge deiin. Basynda úsh jerden gematoma. Bet-aýzy qan josa, syrylǵan túgel. Sol jaq jambasy isip ketken jáne salbyrap tur», - deidi anasy.
Sonymen, tańǵy saǵat toǵyzda jaraqattanǵan sábi oblystyq balalar aýrýhanasyna keshki altyda jetkiziledi. Tez arada ota jasalyp, synǵan jambasyna temir salynǵan. Dárigerler jaǵdaiyn ortasha aýyr dep baǵalady. Endi 4 aidan soń jambasyndaǵy temirdi alý úshin qaita bir operatsiia jasalady.
Anasy balabaqshanyń basshylyǵy men tárbieshilerin de, kólik júrgizýshisin de sotqa bermek. Al, aýdandyq bilim bólimindegiler bala kólikten túskennen keiin baiqaýsyzda qulap qalǵan deidi.
«Bala «Folksvagen Opel» markaly jeńil avtokóliginen túsip, tárbieshisine qarai júgirgen kezde tasqa súrinip qulaǵan. Sonyń saldarynan beti men bas terisi syrylǵan, aiaǵynyń san súiegi synǵan. «Bolashaq» balabaqshasynyń meńgerýshisinen habarlamany ýaqytly bermegeni úshin túsinikteme alynyp, jaýapkershiligi qaralyp jatyr», - deidi Otyrar aýdandyq adami áleýetti damytý bóliminiń basshysy Janat Musataeva.
Aýdandyq politsiia bólimi oqiǵanyń mán-jaiyn anyqtaýǵa kiristi. Sondai-aq, QR QK 345-baby «Kólik quraldaryn basqaratyn adamdardyń jol júrisi nemese kólik quraldaryn paidalaný qaǵidalaryn buzýy» boiynsha jeńil kóliktiń júrgizýshisine qatysty sotqa deiingi tergep-tekserýdi bastady.
