QR Parlament Májilisiniń depýtaty Aidos Sarym Memleket basshysynyń jańa Joldaýyna qatysty pikirimen bólisti, dep habarlaidy QazAqparat.
«Pandemiia kezinde «bebi-býmnyń» jańa rekordyn ornattyq dep jatyrmyz. Oǵan balabaqsha men mektep daiyn ba? Byltyr 425 myń bala dúniege kelipti. Oǵan biyldyń jarty jylyn qosyp 1 mln náreste dep alsaq. Ol 1 mln balaǵa 2 jyldan soń, balabaqsha kerek, 6 jyldan soń mektep kerek. Osyny eskergen Prezident 1000 mektep máselesin búginnen kóterip otyr. Sharýa mektep salýmen bitpeidi, oǵan kadr kerek, ony daiyndaý bólek áńgime. Elordanyń ózinde 1 myńǵa jýyq pedagog tapshy eken. Kózdi ashyp-jumǵansha ol balalarǵa joǵary bilim alý kerek bolady, odan ári olar elimizdiń eńbek naryǵyna qatysady. Osy turǵyda memleket 1 mln balany bilim jáne jumyspen qamtýǵa daiyn ba degen suraq týyndaidy», - dedi Aidos Sarym QR Sybailas jemqorlyqqa qarsy is-qimyl agenttiginde ótken «Antikor Live» jobasynyń efirinde.
Onyń aitýynsha, elimizde álemdik dárejede bilim beretin oqý ordalary az.
«Sondyqtan Joldaýdaǵy tapsyrmadan bólek, qoǵam bilim berý máselesimen shynaiy ainalysýy qajet. Joldaýdaǵy maǵan taǵy bir unaǵan sát, úlken, mega jobalardan bas tartýymyz. Qarap otsańyz, Joldaýdyń ishinde úzdik 30-qa, 10-qa kiremiz, álemdi basqaramyz, qutqaramyz degen áńgime joq. Bizdiń mindet 19 mln halqymyzdyń qamy, sonyń bolashaǵy men bai-qýaty. Jáne bir aityp ótetin sát, Prezident ár tapsyrmasyna jaýapty naqty adamnyń bolýy», - deidi ol.
