Bal óndiretin 10 kásiporyn Saýd Arabiiasynyń senimdi eksporttaýshylar reestrine engizildi, dep habarlaidy "Ult aqparat" Aýyl sharýashylyǵy ministrliginiń baspasóz qyzmetine silteme jasap.
Qazaqstannyń agroónerkásip kesheni salasyndaǵy 2975 kásiporyn ónimderin Eýraziialyq ekonomikalyq odaq, Eýropalyq Odaq, Qytai Halyq Respýblikasy, Koreia Respýblikasy, Ózbekstan Respýblikasy, Birikken Arab Ámirlikteri, Japoniia, Túrkiia jáne Saýd Arabiiasy elderine erkin ótkizedi.
Biyl bal óndiretin jáne óz ónimderin Saýd Arabiiasy Koroldigine eksporttaýǵa daiyn qazaqstandyq 10 kásiporyn atalmysh eldiń tiisti reestrine engizildi.
Jyl basynan beri mal sharýashylyǵy ónimderin jetkizýge quqyǵy bar 4 kásiporyn, sút ónimderin syrtqa shyǵarýǵa ázir 3 kásiporyn, balyq jáne balyq ónimderin saqtaityn, qaita óńdep, ótkizetin 1 kásiporyn Qytaidyń Bas keden basqarmasynyń tizimine engizildi.
Veterinariialyq baqylaý jáne qadaǵalaý komitetiniń Túrkiia tarapymen júrgizgen jemisti jumystarynyń nátijesinde osy eldiń tizimine terini eksporttaýǵa quqyǵy bar 4 kásiporyn engizildi.
«Ministrliktiń 2021 jylǵy josparynda osy naryqtarǵa shyǵaratyn taýar túrlerin kóbeitýdi jalǵastyrý, sondai-aq Eýropalyq Odaqtyń, Túrkiianyń, jáne Ońtústik-Shyǵys Aziia elderiniń jańa naryǵyn igerý kózdelip otyr»,-delingen habarlamada.
