Ońtústik Qazaqstan men Qyzylorda oblystarynda jańbyr jaýyp, ózender arnalarynan asýy múmkin. Bul týraly Úkimettiń selektorlyq rejimdegi otyrysyn ashqan Premer-Ministr Baqytjan Saǵyntaev aitty, dep habarlaidy QazAqparat.
«Ózderińiz kórip otyrǵandai, aýa raiy óte qubylmaly bolyp otyr. Tek sońǵy aptanyń ózinde Astana qalasynda, Aqmola, Pavlodar, Aqtóbe, Qostanai jáne basqa da oblystarda kún raiy kúrt buzylyp, birneshe ret aldyn ala eskertý jariialandy. Málimetter boiynsha aldaǵy kúnderi Ońtústik Qazaqstan men Qyzylorda oblystarynda da jańbyr jaýyp, ózender arnasynan asýy múmkin. Shyǵys Qazaqstan oblysynda da jaýyn-shashyn bolatyny kútilýde. Búgingi kúni shyǵysta jańbyr jáne taýdan aqqan sý eldi mekenderdi basyp qaldy», - dedi Úkimet basshysy.
Osy rette Baqytjan Saǵyntaev óńirdegi jaǵdai boiynsha jáne qabyldanǵan sharalar týraly Shyǵys Qazaqstan oblysynyń ákimi Danial Ahmetovke sóz berdi.
Ahmetovtiń aitýynsha, shyǵysta biyl túsken jaýyn-shashyn kólemi tómen bolǵanymen, jer tońy ótken jylmen salystyrǵanda 2 ese qalyń bolyp otyr. Buǵan qosa, ózenderde qatqan muzdyń qalyńdyǵy kei jerlerden 1 metrden asyp jyǵylǵan.
«Naýryzdyń 1-inen 25-ine deiingi aralyqta jaýǵan jańbyr qalypty normadan 3 ese artyq boldy. Búgingi kúngi jaǵdai boiynsha oblysta úilerdi sý basýdyń 481 faktisi tirkeldi. Qazirgi kezde 175 úide áli sý bar. 628 úi men 110 saiajaidyń aýlasyna sý kirdi. Osyǵan orai joǵary deńgeili daiyndyq rejimi Óskemen jáne Semei qalasynda, Jarma, Zyrian, Kúrshim, Qatonqaraǵai, Ulan aýdandarynda engizildi. Oblystyń úsh aýdanynda Aiagóz, Glýbokoe, Shemonaihada tabiǵi sipattaǵy tótenshe jaǵdai jariialandy», - dedi oblys basshysy.
