Almaty ákimi Baqytjan Saǵyntaev búgin jumys keńesi barysynda farmindýstriia ókilderimen megapoliske dári-dármekterdi jetkizý máselesin talqylady, dep habarlaidy QazAqparat.
«Dárilik preparattarǵa suranysty qamtamasyz etý jáne jedel jaǵdai boiynsha qajetti sharalardy talqylaý úshin farmindýstriia ókilderimen kezekti kezdesý ótkizdim. Kelip túsken dári-dármekter dárihana sórelerine bir táýliktiń ishinde jetkiziledi. Búgin Reseiden preparattardyń iri partiiasy keledi. Shamamen 55 tonna dárilik zattar, sonyń ishinde COVID-19-ǵa qarsy – ystyqty túsiretin jáne antikoagýlianttar bar. Shilde aiynyń sońyna deiin áleýmettik mańyzy bar dári-dármekterdiń 4,2 mln qaptamasy jetkiziledi dep kútilýde», – dedi B. Saǵyntaev.
Qol qoiylǵan memorandým aiasynda qalanyń barlyq aýdandaryndaǵy 105 dárihanaǵa óte qajet preparattardyń 41 túri turaqty jetkizilýde. 1 shildeden bastap dárihanalar áleýmettik mańyzy bar 581 myń dári-dármek qaptamasyn aldy. Jalpy, búgingi kúni 105 dárihana men jetkizýshilerdiń qoimalarynda 1,8 mln qaptamadaǵy qajetti dári-dármekter bar.
Sonymen qatar, qala ákimi dárilik preparattardyń turaqty qoryn jasaý jónindegi jobany júzege asyrý týraly aitty.
«Kelesi qadam – dárilerdiń turaqtandyrý qoryn qurý. Dári-dármek jetkizýshilerdi 6-8 ai merzimge paiyzsyz nesielendirý úshin 5 mlrd teńge bólindi. Bul – dári-dármekterdi aǵymdaǵy baǵa boiynsha satyp alyp, naryqtyń qubylmaly jaǵdaiyna bailanysty birtindep paidalanýǵa berý úshin jasaldy», - dedi qala ákimi.
Sondai-aq, atalǵan 105 dárihanaǵa kún saiyn monitoring júrgiziledi.
