Almaty ákimi Baqytjan Saǵyntaev 60 aqyn-jazýshyǵa aqshalai grant tabystady.
Grantqa úmitkerlerdi Qazaqstan Jazýshylar odaǵynyń komissiiasy anyqtady. Grant somasy – 500 myń teńge.
Ákim grantyn alǵandardyń ishinde dramatýrg Dýlat Isabekov, jazýshy Zeinep Ahmetova, Svetlana Ananina, Qanaǵat Ábilqaiyr, Baqyt Bedelhanuly, Aqberen Elgezek, Júsipbek Qorǵasbek jáne basqalary bar.
Ziialy qaýym ókilderi qarjylai syilyq kóńilderin bir marqaityp tastaǵanyn aitady. «Bul qoldaý arqany keńge salmai, qaita elimizdiń mádenieti men ádebietin damytýǵa belsene atsalysýǵa shaqyrady», - deidi olar.
«Aqyn-jazýshylarǵa kóp nárseniń keregi joq. Bizge osylai kóńil bólip, arqamyzdan bir qaǵyp qoisa boldy. Sonyń ózi úlken shabyt beredi. Jastar jazýǵa umtylady, qoǵamǵa kerek ekenderin sezinedi», - deidi Dýlat Isabekov.
Jalpy Jazýshylar odaǵynyń 820 múshesi bar, onyń 360-sy Almatyda turady. Qala ákimi Baqytjan Saǵyntaev ultymyzdyń damýyna aitýly úles qosqan azamattardyń eńbegi eleýsiz qalmaitynyn atap ótti.
