Búgin Almatyda biyldyqqa birinshi Eýraziialyq úkimetaralyq keńes otyrysy ótti. Otyrysqa Qazaqstan Premer-Ministri B. Saǵyntaev, Resei Premer-Ministri D. Medvedev, Belarýs Premer-Ministri S. Rýmas, Qyrǵyzstan Premer-Ministri M. Abylgaziev, Armeniianyń vitse-Premer-Ministri M. Grigorian jáne Eýraziialyq ekonomikalyq komissiia Alqasynyń tóraǵasy T. Sarkisian qatysty, dep habarlaidy "Ult aqparat".
Aita ketý kerek, biyl Odaq týraly kelisimshartqa qol qoiǵan ýaqyttan beri 5 jyl jáne eýraziialyq integratsiia ideiasyna 25 jyl tolady.
Otyrys dástúrli túrde shaǵyn jáne keńeitilgen formattarda ótkizildi. Kún tártibinde saýda-ekonomikalyq yntymaqtastyq jáne Odaqqa múshe memleketter arasynda ózara saýda-sattyqty keńeitý, sondai-aq, ekonomikanyń jekelegen salalarynda integratsiialyq áleýetti damytýǵa qatysty jalpy 16 másele qaraldy.
Shaǵyn quramda ekonomikalyq ózara is-qimyldyń ózekti máseleleri boiynsha pikir almastyryldy. Atap aitqanda, Odaqqa múshe memleketter arasynda taýar ainalymyn odan ári ulǵaitý, sonyń ishinde saýda-sattyq, enegetika, aýyl sharýashylyǵy, kólik jáne logistika, salyq jáne keden saiasaty salalaryndaǵy zańnamalyq normalardy biregeilendirý arqyly qol jetkizý quraldary talqylandy. Budan ózge, bilim berý salasynda birqatar qujatty ózara moiyndaý júiesin jetildirý keleshegi qaraldy. Sonymen qatar, EAEO tsifrlyq kún tártibi aiasynda jobalardy iske asyrý tetikterine kóńil bólindi.
Keńeitilgen quramda Úkimetaralyq keńes músheleri 2018 jyly Eýraziialyq ekonomikalyq odaqtyń múshe memleketteri arasynda saýda-sattyqty damytý qorytyndylaryn shyǵaryp, Odaq elderindegi makroekonomikalyq jaǵdaidy qarastyryp, Eýraziialyq ekonomikalyq komissiia Alqasynyń turaqty ekonomikalyq damýdy odan ári qamtamasyz etý jónindegi usynystaryn tyńdady.
Qazaqstan Premer-Ministri Baqytjan Saǵyntaev sóz sóileý barysynda 2018 jyly ortaq kúsh-jigermen aktivter «qorjyny» jinaqtalǵanyn, ony aldaǵy ýaqytta da damytý qajet ekenin aitty. EAEO Tsifrlyq kún tártibin iske asyrý belsendi túrde pysyqtaldy. Tsifrlyq bastamalardy basqarý ofisine ondaǵan perspektivaly usynystar kelip tústi, olardyń birqatary búginde qaralyp jatyr. Turaqty negizde kedergilerdiń kelisilgen tizimi ózektendirilip jatyr, ótken jyldyń qorytyndysy boiynsha 17 kedergi joiyldy. Budan ózge, Joǵary keńestiń ótken otyrysynda (2018 jylǵy 6 jeltoqsanda) Memleketter basshylary gaz, munai jáne munai ónimderiniń ortaq naryqtaryn qalyptastyrý baǵdarlamalaryn bekitti, sondai-aq EAEO aiasynda integratsiialyq úderisterdi odan ári damytý týraly Deklaratsiia qabyldandy. Ortaq naryq qalyptastyrý turǵysynan 9 jyl boiy soǵan qatysty jumystar júrgizilgen alkogol ónimderiniń qaýipsizdigi týraly biryńǵai reglament ázirlendi. Alkogol men temekige salynatyn aktsizder salasyndaǵy salyq saiasatynyń qaǵidalary týraly kelisimder jobalarynyń jumystary aiaqtalyp qaldy.
Sonymen birge, aldaǵy eki jylǵa kedergilerdi joiýdyń jańa Jol kartasyn ázirleý qajettiligi atalyp ótti. Singapýrmen jáne Serbiiamen erkin saýda aimaǵyn qalyptastyrýdyń kelissózder protsesin odan ári júrgizý, sondai-aq, Izrailmen jáne Mysyrmen saýda kelissózderin jandandyrý jumystaryn júrgizý qajet. Atalǵan naryqtarǵa qolaily ashyq jaǵdailar jasaý EAEO elderiniń eksporttyq áleýetin iske asyrýǵa eleýli túrde yqpal etetin bolady.
Qazaqstan tarapy EAEO elderiniń azamattaryn zeinetaqymen qamtamasyz etý týraly kelisimdi ázirleý aiasynda áleýmettik máselelerdiń basymdyqty ekenin atap ótti. Bul máselelerdi Joǵarǵy keńestiń ótken otyrysynda QR Prezidenti N. Nazarbaev kóterdi.
Otyrys qorytyndysy boiynsha kedendik ákelim bajyn bólý normativteri, qazaqstandyq kómir eksporttaýshylardyń Resei Federatsiiasynyń teńiz porttarynyń qyzmetterine qoljetimdiligi máseleleri boiynsha birqatar qujattar qabyldandy, sondai-aq Eýraziialyq ekonomikalyq odaqtyń tsifrlyq kún tártibindegi jobalardy iske asyrý tetikteri bekitildi jáne Alkogol ónimderin retteý týraly kelisim jobasy maquldandy. Budan ózge, EAEO-ǵa múshe elderdegi ózara saýda jaǵdaiy, makroekonomikalyq jaǵdai jáne turaqty ekonomikalyq damýdy qamtamasyz etý boiynsha usynystar týraly, sondai-aq Odaqqa qatysýshy elder arasynda júieli konsýltatsiialar ótkizý týraly ókimder qabyldandy.
Kún tártibindegi negizgi máselelerdiń biri — Odaqqa múshe memleketterdiń kemeleri úshin tasymaldaý rásimderin jeńildetýge jáne EAEO elderiniń ishki sý joldarynda kemelerdiń júzýi kezinde týyndaityn qatynastardy retteýdiń biryńǵai quqyqtyq bazasyn qurýǵa arnalǵan keme qatynasy týraly kelisimge qol qoiý boldy. Óz kezeginde, Qazaqstan úshin Kelisimge qol qoiý strategiialyq mańyzǵa ie jáne otandyq flotqa qysqa merzim ishinde Reseidiń ishki sý joldarymen Qara jáne Baltyq teńizine ótýge múmkindik beredi.
Eýraziialyq úkimetaralyq keńestiń kelesi otyrysy biylǵy sáýir aiynyń sońynda – mamyr aiynyń basynda Erevanda (Armeniia) ótedi.
