Ol Taldyqorǵannyń týmasy eken, qazirgi kezde Shymkent qalasynda turatyn kórinedi. Respýblikalyq «Internatsionalister» qoǵamdyq uiymynyń tóraǵasy qyzmetin atqarady deidi.
Budan burynyraq Baqytjan Kopbaev jáne ol basqaratyn uiymnyń Qaraǵandy oblystyq filialy tóraǵasy Anna Nevskaia Resei telearnalarynyń birindegi «Na samom dele» baǵdarlamasyna suhbat beripti. Ekeýi júrgizýshi jýrnalistiń suraqtaryna «Qazaqstanda fashizm boi kóterdi, qazaq ultshyldyǵy qoshqyl oba tárizdi taraýda!» – dep jaýap qaitarǵan. Solai dei otyryp ózderin qazaq fashisterine qarsy kúresip júrgen antifashist qaharmandar beinesinde kórsetti!..
Sondai-aq ol áleýmettik jeli arqyly jasaǵan beinemálimdemesinde jurtshylyqty Pavlodar qalasynyń ataýyn qorǵaýǵa shaqyrǵan bolatyn! Sol Baqytjan endi (30.01.2020) Pavlodarǵa kelip, «Pavlodar» qonaq úiiniń májilis zalyna qala turǵyndaryn ózimen kezdesýge shaqyrdy. Bul sharada túrli máseleler kóteriletini, onyń ishinde qala ataýyna bailanysty másele de qozǵalatyny, óziniń Pavlodar ataýyn ózgertýge qarsy ekeni jóninde beinemálimdeme taratty.
Áitse de, shymkenttik qonaqtyń bizdiń qalanyń ataýy boiynsha jiyn ótkizýge moraldik jaǵynan da, zań turǵysynan da quqy joq bolatyn. Soǵan qaramastan, ózi shaqyrǵan soń bardyq, onymen niettes orystildiler de keldi. Bulardyń deni Keńes kezeńin kókseitin egde jastaǵy adamdar eken.
Baqytjan orys tilinde sóiledi. Qazaq tildilerdiń saýaldaryna jiynnyń sońynda jaýap beretinin eskertti. Sóz basynda internatsionalister uiymy jóninde aita kelip, Pavlodarda uiymnyń filialyn quratynyn, onyń tóraǵalyǵyna jergilikti azamatty bekitkenin jariia etti de, janynda turǵan saqaldy jas jigitti nusqady. Sonan soń Keńes úkimetine degen rizashylyq sezimin bildirip edi, zaldyń ár tusynan qol shapalaqtaýshylar boi kórsetti. Áitse de ol ózi uiymdastyrǵan jiyn ústinde eshkim kútpegen áreketke baryp, Pavlodar ataýy jóninde másele qozǵamaitynyn málimdedi. (Meniń paiymdaýymsha, jinalǵan jurtshylyq arasynda ózge ult ókilderine qaraǵanda qazaqtar sanynyń basymdyǵyn eskerip, aldyńǵy oiynan ainyǵan siiaqty). Sol-aq eken oǵan niettes orystildiler toby oryndarynan óre túregelip shýlap qoia berdi! «Endeshe nege Pavlodar ataýy jóninde másele kóteriledi degen aqparat tarattyń, bizdi bul jerge aldap shaqyrdyń ba?!» – dep ózine dúrse qoia berdi. Baqytjan bolsa, «Men ondai habar taratqan joqpyn, basqa bireýler sózimdi teris burmalap jibergen shyǵar» – dep aqtalǵan boldy.
Aqyry, qala ákiminiń áleýmettik sala boiynsha orynbasary Svetlana Gladysheva ortaǵa shyǵyp: «Pavlodar ataýyna bailanysty qala ákimdigine qandai da bir bastamashyl toptan ótinish túsken joq. Onyń ústine biylǵy jyly Qazaqstanda sanaq júrgizilýine bailanysty eldimekenderdiń, kóshelerdiń, basqa da nysandardyń ataýlary ózgertilmeidi. Pavlodar ataýyn qoldaityndar da, ózgertkisi keletinder de memlekettik organdarǵa ótinish túsirýge tiisti. Másele zań aiasynda qaralýy kerek» degen oilaryn ortaǵa saldy.
Sonda ǵana ý-shý saiabyrsyp, aldymen orystildi top zaldy tastap ketti. Sodan soń qazaqtildiler tarqady. Tek qazaq jigitteriniń birnesheýi Kopbaevty ortaǵa alyp, túrli ótkir suraqtar qoidy! Olardyń bireýi: «Shymkentke qashan qaitasyń, shyǵaryp salaiyq...» – dep edi, Baqytjan rahmetin aitty. Osylaisha, bul kezdesý bastalmai jatyp ý-shýmen aiaqtaldy.
Endeshe Baqytjan Kopbaev Kerekýge kimderge senip keldi? Ol basqaratyn uiymnyń qoldaýshysy kimder, is-saparlaryn qandai mekemeler qarjylandyrýda? Resei telearnalary nelikten oǵan aqparattyq qoldaý kórsetýde? Kopbaevtyń ar jaǵynda «Rýsskii mir» turǵan joq pa? – degen saýaldar týyndaýy oryndy.
Bulardyń jaýaby keiin tabyla jatar. Al Baqytjannyń ózi budan arǵy ýaqytta Kerekýge kelýge sonshalyq qumarta qoimaityn shyǵar degen oidamyz...
Shymkenttik qonaq áleýmettik jeliler arqyly Pavlodar ataýy jóninde taratqan beinemálimdemeleriniń birin joiyp, ekinshisin bógde kózderden jasyryp qoiypty. Osy jaitqa orai «Nege?» degen taǵy bir suraq týyndaidy.
Arman Qani
