Jer kodeksiniń 12-babyna sáikes, úlestes zańdy tulǵa ózinen bólek 10, tipti 100 zańdy tulǵa ashyp, olardyń árqaisyna quryltaishy bola alady. Bul týraly QR Aýyl sharýashylyǵy ministrligi jer reformasy komissiiasynyń otyrysynda zańger Baqytjan Bazarbek aitty, dep habarlaidy QazAqparat.
«Materialisterdiń paida bolýy qoǵamnyń narazylyǵyn týǵyzyp otyr. Úlken-úlken jerlerdi, myńdaǵan, milliondaǵan gektar jerdi menshiktep alǵan jer ielenýshileri bar. Úlestes zańdy tulǵa Jer kodeksiniń 12-babyna sáikes ózinen bólek 10, tipti 100 zańdy tulǵa ashyp, onyń árqaisysyna quryltaishy bola alady. Árbirine tiisti shekti kólemde jerdi rásimdep, al shyn máninde ol jerdiń bárine ózi ielik etýge múmkindigi bar», - deidi «Bazarbek&Partners» zań kompaniiasynyń bas direktory Bazarbek Jumabekuly.
Onyń aitýynsha, mundai monopoliianyń aldyn alý úshin Jer kodeksiniń 50-baby, 3-tarmaǵynan «úlestes zańdy tulǵa» degen uǵymdy alyp tastaý kerek.
«Bul uǵymdy zańnan alyp tastaý kerek nemese «zańdy tulǵa men onyń úlestes tulǵalary jalpy jiyntyqpen bir ǵana kólemdegi jerge ie bolýy tiis» degen uǵymdy engizýimiz kerek. Bul – halyq úshin igi bastama bolar edi», - deidi ol.
