Almaty ákimi Baqytjan Saǵyntaev ómirlik qiyn jaǵdaiǵa tap bolǵan áielderdi áleýmettik qoldaý ortalyqtarynyń ózgertetini týraly aitty, dep habarlaidy "Ult aqparat".
Ákim Instagram paraqshasynda byltyr ár aýdanda «Baqytty otbasy» áleýmettik qoldaý ortalyqtaryn ashý basty maqsat bolǵanyn eske saldy. Munda áielder arasyndaǵy kásipkerlikti damytýǵa basa nazar aýdaryldy. Is júzinde olar kópbalaly analarǵa arnalǵan iskerlik belsendiliktiń ortalyǵyna ainalýy tiis boldy.
«Isker Ana baǵdarlamasy boiynsha biznes daǵdylaryna úiretýdi bastap, innovatsiialyq jobalardy iske qosý úshin granttar usyndyq. Aqmaral Basirova qurǵan Alataý aýdanynyń «Baqytty otbasy» ortalyǵy bir jyldyń ishinde Almatynyń ózge aýdandary úshin ǵana emes, elimizdiń basqa óńirleri úshin de úlgi bola bildi», - dep jazdy B. Saǵyntaev.
Onyń aitýy boiynsha munda áielderge tek keńes berilip qana qoimaidy. Qiyn jaǵdaiǵa tap bolǵan áielderdiń ózderine qaita senýine, ózderine unaityn nárseni tańdap, ómir saltyn tolyǵymen ózgertýlerine kómektesedi. Analar óz mysalynda balalarǵa óz eńbegimen aqsha tabýǵa bolatynyn kórsetedi. Kún saiyn munda 150-ge jýyq áiel keledi. Bir jyldyń ishinde 25 myń áiel 31 baǵyt boiynsha túrli kýrstarda bilim aldy.
Almaty ákimi bir jyl buryn ortalyqqa bapker retinde kelgen Móldir Júnisbekovanyń ómirin mysalǵa keltirdi. Ol 500-ge jýyq áieldi oqytsa, sonyń 200-i búgin jumys tapty. Tipti olar jańa jumys oryndaryn qurýda.
«BJK-2025» boiynsha 2,5 mln teńge kóleminde grantqa ie bolǵan Móldir 10 áiel eńbek ete alatyn tigin tsehyna arnalǵan jabdyqty satyp aldy.
Biyl jyl basynan beri Alataý aýdanynyń «Baqytty otbasy» ortalyǵynda 27 myń áielge «Isker ana» baǵdarlamasy boiynsha aqparattyq-konsýltatsiialyq-resýrstyq qoldaý kórsetildi. Treningter men kýrstarda 25 myń adam oqydy.
Sonymen qatar, «Biznes Bastaý» baǵdarlamasy boiynsha 537 áiel bilimderin jetildirdi. Olardyń 300-i grant alyp, kiim jóndeý, konditer, shashtaraz, manikiýr salondaryn ashty, balalardyń damý kitaptaryn jasap, avtokólik muqabalaryn tigip jáne basqa da salalar boiynsha ózderiniń kásipterin bastady.
Eki áiel «Biznestiń jol kartasy-2025» aiasynda innovatsiialyq jobalardy iske asyrýǵa 2-den 5 million teńgege deiin memlekettik grant aldy. Óndiris sheberhanalaryn ashý úshin alańdar berilip, al ónimderin satý úshin bazarlardan 50-ge jýyq oryn bólingen.
