Búgin Atyraý oblysy ákiminiń burynǵy orynbasary Baqytgúl Hamenovanyń isine qatysty sot otyrysy qaita jalǵasty, dep habarlaidy QazAqparat.
Atyraý qalasyndaǵy №2 sotta Baqytgúl Hamenovanyń isine qatysty sot otyrysy ótip jatyr.
Sot otyrysynda «Meniń bul qylmystyq oqiǵaǵa qatysym bolǵan joq. Osy is boiynsha zańǵa sáikes aqtaý úkimi shyǵarylýy múmkin», -dedi Baqytgúl Hamenova.
Oblystyq sottyń baspasóz qyzmetiniń málimetinshe, biylǵy 26 mamyrda Atyraý qalasynyń №2 sotyna QR Qylmystyq kodeksi 366-babynyń 3-bóligi 2-tarmaǵymen Atyraý oblysy ákiminiń orynbasary Baqytgúl Hamenovaǵa, Atyraý oblysy Mádeniet, tilderdi damytý jáne arhiv isi basqarmasynyń basshysy Aqylbek Rysqalievke, QR Qylmystyq kodesi 367-babynyń 2-bóligimen «B» JShS direktoryna qatysty qylmystyq is tústi.
Al, 11 tamyzda Atyraýdaǵy №2 qalalyq sotta Baqytgúl Hamenovaǵa qatysty sot otyrysy bastaldy. Aiyptaý aktisi 55 betten turady.
Alǵashqy sot otyrysynda Baqytgúl Hamenova ózine taǵylǵan aiypty moiyndamady.
Eske sala ketelik, buǵan deiin Prokýratýra ókili Baqytgúl Hamenovany 7 jylǵa bas bostandyǵynan aiyrýdy usynǵanynjazǵan edik.
Sot otyrysynda prokýroratýra ókili Laýra Asanova oblys ákiminiń burynǵy orynbasary Baqytgúl Hamenovany 7 jylǵa bas bostandyǵynan jáne «Qurmet» ordeninen aiyrýdy usyndy.
«Múlki tárkilenip, memlekettik laýazymdardy atqarý quqyǵynan ómir boiyna aiyra otyryp, 7 jylǵa bas bostandyǵynan aiyrý jazasy taǵaiyndalsyn. Merzimdi óteý ortasha qaýipsizdik mekemesinde anyqtalsyn. Sottalýshynyń kámeletke tolmaǵan balasynyń bolýyna bailanysty jazany úsh jylǵa deiin keiinge qaldyrýdy suraimyn», -dedi Laýra Asanova.
