Parlament Májilisiniń depýtaty Baqytbek Smaǵul Qordai aýdanyndaǵy janjalǵa bailanysty Jambyl óńirine attanyp ketti. Depýtattyń aitýynsha, qazir el ishin ala taidai búldirmei, el birligin tanyta bilýi kerek, dep habarlaidy QazAqparat tilshisi.
«Qordai jaqtan osy habardy estigennen keiin áriptesim Shákir Hahazov ekeýimiz birden sol jaqqa jolǵa shyqtyq. Eldiń jarasyn tyrnaǵanymyz durys emes. Odan da sabyr men aqylymyzdy serik etip, eldi tatýlyqqa shaqyramyn. Asyl halqymyzdyń basynan ne ótpedi. Sondyqtan bereke-birligimiz, elimizdiń bolashaǵy, erteńimiz úshin tynyshtyq qajet. «Ashý – dushpan, aqyl - dos» deidi dana halqymyz. Biz endi dabyramen emes, sabyrmen kóp nárseni sheshken halyqpyz ǵoi. Daý men jaýdan alys bolaiyq. Óz berekemizdi, birligimizdi saqtaiyq», - deidi Baqytbek Smaǵul.
Buǵan deiin Jambyl oblysynyń Qordai aýdanyndaǵy Masanchi aýylynyń turǵyndary arasynda jappai tóbeles bolǵanyn habarlaǵan bolatynbyz.
Kóp ýaqyt ótpei Prezident Qasym-Jomart Toqaev Jambyl oblysy Qordai aýdanynda bolǵan jappai tóbeleske qatysty pikir bildirdi.
«Jambyl oblysy Qordai aýdanynda buzaqylyq sipattaǵy jappai tóbeles boldy. Ony arandatýshylar óz paidasyna qoldanbaq bolǵan. Politsiia jaǵdaidy rettep, óz baqylaýyna aldy. Qoǵamdyq tártipti buzǵandar jaýapkershilikke tartylady», dep jazdy Qasym-Jomart Toqaev Twitter-degi paraqshasynda.
Al búgin Memleket basshysy Jambyl oblysyndaǵy oqiǵaǵa bailanysty málimdeme jasady.
