Qarjy ministri Baqyt Sultanov QR Úkimet basshysy Baqytjan Saǵyntaevtan biýdjet qarjysynyń igerilmeýine bailanysty vitse-ministrlerdi jazalaýdy surady, dep habarlaidy QazAqparat.
«2017 jylǵy 11 aiynyń qorytyndysy boiynsha Úkimet otyrysynda biýdjet qarajatyn igerýde belgili bir táýekelder jóninde aitylǵan bolatyn. Aldymyzda Parlamentte jyldyq esep nátijelerin talqylaý tur. Onda mindetti túrde jaýapkershilik týraly suraq týyndaityny anyq. Osyǵan orai qarjyny tolyq igermegen ortalyq memlekettik organdar boiynsha Úkimetke ministrdiń orynbasary jáne komitetter tóraǵasy deńgeiindegi laýyzym ielerin jaýapkershilikke tartýǵa usynys engizemiz. Nysanaly transfertterdiń somasyn igermegen aimaqtardyń ákimderinen de tiisti laýazymdy tulǵalardy jaýapkershilikke tartýyn suraimyn», - dep atap ótti B. Sultanov Úkimet otyrysynda.
Onyń sózine qaraǵanda, ótken jyly jalpy somasy 8,6 trln teńgege 496 myń memlekettik satyp alý rásimi kameraldyq baqylaýmen qamtyldy. Tekserý qorytyndylary boiynsha jalpy somasy 728 mlrd teńgege buzýshylyqtar anyqtaldy. Onyń ishinde konkýrstardyń qorytyndylaryn joiý jáne qaita qaraý jolymen 710 mlrd teńge somaǵa, iaǵni 97,5 paiyzǵa buzýshylyqtar ýaqtyly joiyldy.
Aýditorlyq is-sharalarmen 2,3 trln teńge biýdjet qarajaty qamtyldy. Barlyq somasy 275 mlrd teńgege qarjylyq buzýshylyqtar anyqtaldy. Onyń ishinde taýarlardy jetkizý, qyzmetter kórsetý jáne jumystardy oryndaý, biýdjetke óteý jáne esepke alý boiynsha kórsetý jolymen 259 mlrd teńge túzetildi.
Budan bólek ol memlekettik biýdjettiń áleýmettik quramyn arttyrý qamtamasyz etilgenin atap ótti.
«2016 jylmen salystyrǵanda áleýmettik salaǵa arnalǵan shyǵystardyń ósý qarqyny 112 paiyzdy quraidy, al olardyń taza shyǵystardaǵy úlesi 51 paiyzǵa jetti. Al, memlekettik biýdjettiń negizgi parametrlerine kelsek, olar aldyn ala derekter boiynsha oryndaldy. Kirister boiynsha jyldyq jospar barlyq biýdjetterde asyra oryndaldy. Ótken jylǵa qaraǵanda memlekettik biýdjettiń kiristeriniń ósimi 700 mlrd teńgeni qurady», - dep toqtaldy Qarjy ministri.
Shyǵystar boiynsha jumys barynsha joǵary atqaryldy: memlekettik biýdjet - 99,7%, respýblikalyq biýdjet - 99,8% jáne jergilikti biýdjet - 99,6%.
«Respýblikalyq biýdjettiń tapshylyǵy 1 357 mlrd teńgeni qurady. Bul jospardaǵydan (1486 mlrd.teńge) 129 mlrd teńgege az. Biýdjet qarajaty 2016 jylǵa qaraǵanda aýditorlyq is-sharalarmen jáne kameraldyq baqylaýmen eki esege kóp qamtyldy. Ákimshilik jaýapkershilikke tartylǵan adamdardyń sany 2,2 esege azaidy. Ol, kameraldy baqylaýdaǵy preventivtik sharalar tiimdiliginiń artýy arqasynda qamtamasyz etildi», - dedi B. Sultanov.
