Astana ekonomikalyq forýmyna qatysýǵa kelgen Estoniia astanasy Tallin qalasynyń meri Mihail Kylvartpen Nur-Sultan qalasynyń ákimi Baqyt Sultanov kezdesti, dep habarlaidy "Ult aqparat".
Ákimdik saitynyń málimetinshe, Baqyt Sultanov eki el arasyndaǵy qarym-qatynas ózara túsinistik jaǵdaiynda damyp kele jatqanyn atap ótti. «Elbasy Nursultan Nazarbaevtyń saliqaly saiasatynyń arqasynda biz basqa qalalardyń júz jylda jetken belesterin 20 jyl ishinde baǵyndyrdyq. Damý tájiribesi bar, endi bizge sapaly ósý qajet. Osy maqsatta biz ekonomika, týrizmdi damytý, ómir súrý úshin qolaily jaǵdai jasaý turǵysynan sheberlik josparyn ázirlep jatyrmyz», - dedi Baqyt Sultanov.
Kezdesý aiasynda Baqyt Sultanov ózara is-qimyldyń baǵdarlamalyq qujatyn jasaýdy, eki elordanyń yntymaqtastyǵyn tereńdetýdi usyndy.
Óz kezeginde Tallin meri Mihail Kylvart qala Qazaqstan astanasy ǵana emes, sondai-aq aimaqtyń ekonomikalyq, saiasi jáne mádeni ortalyǵyna ainalýy múmkin ekendigin atap ótti.
«Sondyqtan da eki qala men eki astananyń arasyndaǵy yntymaqtastyqqa basa nazar aýdarǵym keledi», - dedi ol.
Qos tarap aldaǵy ýaqytta kólik jáne qalalyq infraqurylymdy damytý, meditsinalyq týrizm jáne bilim berý salasyndaǵy yntymaqtastyqty arttyrýǵa kelisti.
