QR Saýda jáne integratsiia ministri Baqyt Sultanov saýdany damytýdaǵy túitkildi problemalardy atady, dep habarlaidy QazAqparat.
«Álemdik jalpy ishki ónimdegi saýdanyń úlesi 23 payzdy quraidy. Sonymen birge, álemdik saýda úshin basty táýekelderdiń biri - saýda protektsionizminiń kúsheiýi. Dúniejúzilik bank sarapshylarynyń baǵalaýy boiynsha jahandyq taýar ainalymy 9 paiyzǵa qysqarady. Al, ekonomikalyq aimaqtardyń kúsheiýi, ásirese, Eýropalyq Odaq jáne Aziia-Tynyq muhity elderinde taýar ainalymynyń 60 paiyzy óńiraralyq saýdaǵa beiimdelýde», - dedi ol Senatta ótip jatqan Úkimet saǵatynda.
Ministr osy tendentsiialardy eskere otyryp, saýdany damytýdaǵy birqatar túiindi problemaǵa toqtalyp ótti.
«Olardyń ishinde zamanaýi saýda formattarynyń jetispeýshiligi jáne saýda-logistikalyq nysandarynyń ózara qatynastarynyń bolmaýy bar. Sonymen qatar ishki naryqta sapasy tómen taýarlardyń, ásirese sheteldik taýarlardyń basym bolýy azamattardy tolǵandyrady jáne otandyq ónimniń qaýipsizdigin qamtamasyz etetin tehnikalyq retteý infraqurylymy jańǵyrtýdy qajet etedi. Qazaqstandyq taýardyń syrtqy naryqtaǵy básekege qabilettiligi eksporttyń quramynda shikizattyń basymdylyǵymen sipattalady. Budan basqa, eksportty ilgeriletý infraqurylymyndaǵy kedergiler óndirýshilerdiń syrtqy naryqtarǵa qoljetimdiligin qiyndatady», - dedi Baqyt Sultanov.
