Astanany 2035 jylǵa deiin damytý jospary ázirlenedi. Bul týraly búgin elorda ákimi Baqyt Sultanov qala aktivimen ótken jyldy qorytyndylaýǵa arnalǵan jiynda aitty, dep habarlaidy "Ult aqparat".
Onyń aitýynsha, 2030 jylǵa qarai elordada halyq sany 2 mln adamǵa deiin ósse, 2050 jylǵa qarai 3 mln-nan asady dep kútilýde. Osyǵan bailanysty, Astanany jahandyq qala retinde damytý birneshe negizgi baǵyttar boiynsha júzege asady dep josparlanyp otyr.
«Birinshisi - adami damý. Qalanyń basty kapitaly - turǵyndar. Talanttardy tartý úshin qalalyq ortany barynsha tartymdy jáne jaily etý kerek. Eń aldymen, bul - qoljetimdi, sapaly turǵyn úi, qaýipsiz qoǵamdyq kólik, densaýlyq saqtaý men bilim berýdiń joǵary sapasy, qoǵamdyq qaýipsizdik. Ekinshisi - qalanyń kreativti ekonomikasy. Memleket basshysy atap ótkendei, Astananyń tartymdy týristik destinatsiiasyn ózgerte otyryp, aqyldy jáne meiirimdi qalaǵa ainalýyna erekshe kóńil bólinedi. Bul - qonaqjailyq atmosferasyn qalyptastyryp, turǵyndar men týrister úshin qalalyq servisti jaqsartý. Astana jahandyq saýda aǵyndarynyń habyna, eń iri tutyný naryǵyna jáne eldiń negizgi kólik-logistikalyq torabyna ainalýy tiis. Tiisinshe, bul qala qazynasyna qosymsha salyq ákeledi», - dedi ol.
Baqyt Sultanov úshinshi qalalyq josparlaý máselesine toqtaldy.
«Bul strategiialyq qalalyq josparlaýdyń jańa formatyna kóshýdi bildiredi. Ol úshin biz 2035 jylǵa deiin Astanany damytý josparyn ázirleimiz», - dep atap ótti B.Sultanov.
