AQSh prezidenti Donald Tramp keńesshilerimen birge Irannyń iadrolyq nysandaryna soqqy berý máselesin talqylaǵan. Bul aqparatty Amerika basylymdary jazdy.
The New York Times-tyń jazýynsha, Tramp 12 qarashada joǵary laýazymdy keńesshilerimen (arasynda vitse-prezident Maik Pens, qorǵanys ministri mindetin atqarýshy Kristofer Miller de bar) kezdesý kezinde ortaǵa osyndai saýal tastaǵan. Ol kómekshilerinen Irannyń negizgi iadrolyq nysanyna soqqy jasaý yqtimaldyǵy jóninde pikirlerin suraǵan. Kómekshileri prezidentti bul oiynan ainytýǵa tyrysqan.
Amerika sheneýnikteriniń biri 17 qarashada Reuters agenttigine bergen suhbatynda maqalada jazylǵan jaitty rastady.
"Ol qandai amaldar baryn surady. Olar yqtimal stsenariilerdi alǵa tartty, aqyry bul baǵytta jyljymaý týraly sheshim qabyldady" dedi sheneýnik.
Aq úi túsinikteme berýden bas tartty.
Donald Tramptyń keńesshilerimen kezdesýi aldynda Atom energiiasy jónindegi halyqaralyq agenttiktiń Irannyń baiytylǵan ýran qoryn kóbeitip jatqany týraly baiandamasy jaryq kórgen bolatyn. MAGATE sarapshylary Irannyń Netenze kombinatynda baiytylǵan ýran kólemi 5 jyl buryn Tegeranmen jasalǵan halyqaralyq kelisimde kórsetilgen mólsherden 12 ese asyp ketkenin jazǵan. Tramp Irannyń iadrolyq qarýdy iemdenýge umtylysyn toqtata almaitynyn aityp, 2018 jyly kelisimnen shyqqan edi.
"Amerika daýysy" saitynyń jazýynsha, Irannyń Netenzedegi iadrolyq nysanyna soqqy jasaý aimaqaralyq qaqtyǵysty órshitip, jańadan sailanǵan Djo Baiden ákimshiliginiń syrtqy saiasat boiynsha júgin aýyrlatýy múmkin. Esh dálel keltirmei, qarsylasy Baiden komandasyn "sailaýda daýys urlady" dep aiyptap otyrǵan Tramp ázirge bilikti tapsyrý protsesin bastaýdan bas tartyp otyr. Sol sebepti de Baiden komandasy ulttyq barlaý qyzmetiniń aqparatyna qol jetkize almai keledi.
