Soltústik Koreia men AQSh arasynda áskeri janjal tutaný qaýpi kúsheigen tusta Reseidiń Soltústik Koreiamen shekarasyna aýyr áskeri tehnikalaryn shoǵyrlandyra bastaǵany habarlandy.
Reseilik BAQ-tyń habarlaýynsha, ótken aptanyń sońynan bastap Qiyr Shyǵys turǵyndary temirjolmen jáne kólik joldarymen aýyr áskeri tehnikalardyń Soltústik Koreiamen shekaraǵa qarai áketilip jatqanyna kýá bolyp jatyr. DVHab.ru saitynda jariialanǵan videoda áskeri tehnika, onyń ishinde zenit-zymyran keshenderi tielgen temirjol eshelondarynyń ketip bara jatqany kórinedi. Eshelon Habarovsk ólkesiniń territoriiasymen shekaradan 100 kilometr qashyqtyqta ornalasqan Vladivostok qalasyn betke alyp ketip barady.
"Tańerteńnen beri bul áskeri tehnika tielgen úshinshi temirjol quramy" deidi videodaǵy er adam. Saittyń habarlaýynsha, jergilikti turǵyndar yqtimal qaqtyǵystyń Reseidiń Soltústik Koreiamen shektes aimaqtary úshin tietin saldaryna qatysty "dúrlige bastaǵan".
AQSh pen Soltústik Koreia buǵan deiin aldyn alý sharasy retinde bir-birine áskeri soqqy jasaýy múmkin ekenin eskertken. Phenian taiaýda iadrolyq qarý qoldanýy múmkin ekenin málimdegen.
"Vostok media" saitynyń habarlaýynsha, jergilikti turǵyndar Habarovsk - Vladivostok jolymen ońtústik baǵytqa qarai BTR, tikushaq jáne basqa da aýyr áskeri tehnikalardyń ketip bara jatqanyna kýá bolǵan. BAQ aqparatyna qaraǵanda, Resei áskeri vedomstvosynyń resmi ókili áskeri tehnika "josparly" jattyǵý aiasynda tasymaldanyp jatqanyn aitqan.
