Ulty ózbek reseilik milliarder Álisher Ýsmanov Ózbekstannyń koronavirýs infektsiiasymen kúresip jatqan medqyzmetkerlerine 100 milliard som (shamamen 10 million dollar) bóldi. Bul týraly eldegi UZA.uz memlekettik aqparat agenttigi habarlady.
Dárigerlerge bes million somnan (500 dollar), orta meditsina qyzmetkerlerine tórt million somnan (400 dollar), kólik júrgizýshilerine úsh million somnan (300 dollar) beriledi dep josparlanyp otyr. Ústemaqyny tek 1 maýsymǵa deiin jumysqa alynǵan qyzmetkerler alady.
Resmi derek boiynsha, epidemiia bastalǵaly Ózbekstanda 22 myńnan astam adam koronavirýs infektsiiasyn juqtyrǵan. Aýrý saldarynan 130-dan astam adam qaitys bolǵan. Alaida beiresmi derekkózder shynaiy sandar budan joǵary degen pikir aitady. Shilde aiynda aýrýǵa shaldyqqandar sany kúrt kóbeiip, úkimet qatań karantin shekteýlerin engizdi.
Álisher Ýsmanov – USM Holdings kompaniiasy men "Kommersant" baspa úiiniń negizgi aktsioneri. Forbes jýrnalynyń Reseidegi eń bai kásipkerler tiziminde Ýsmanov jetinshi orynda tur. 2015-2019 jyldary ol qaiyrymdylyq maqsatyna 1,3 milliard dollar jumsaǵan, onyń 400 million dollary 2019 jyldyń úlesinde.
2018 jyldyń basynda AQSh qarjy ministrligi Álisher Ýsmanovqa qarsy jeke ekonomikalyq sanktsiia saldy. Ony Reseidegi Kremlmen bailanysy bar, saiasi bedeli eń joǵary oligarhtardyń biri dep atady. AQSh qarjy ministrligi sondai-aq Ýsmanovtyń menshigine Reseidiń birqatar beldi basylymdary kiredi dep atap ótken. New York Times, Guardian jáne tergeý jýrnalisteri konsortsiýmynyń zertteýinshe, Álisher Ýsmanov Facebook jelisine 200 million dollar qarajat quiǵan.
