Qazaqstan Prezidenti Qasym-Jomart Toqaevtyń búgingi Qazaqstan halqyna joldaýynda osy ýaqytqa deiin qoǵam tarapynan belsendi talqylanǵan jáne sarapshylardyń oi eleginen ótkizilgen saiasi reformalardyń bir top baǵyttary qamtyldy. Mundai pikirdi QR Prezidenti janyndaǵy Qazaqstan strategiialyq zertteýler institýtynyń halyqaralyq qatynastar bóliminiń basshysy Ásel Nazarbetova aitty, dep habarlaidy QazAqparat.
Onyń aitýynsha, Memleket basshysy usynǵan bastamalar, olardy júzege asyrý mehanizmderi el azamattarynyń kóńilinen shyqty.
Sebebi bul sheshimder halyqtyń búgingi tańdaǵy talaptaryna, qoǵamnyń damý deńgeii men suranystaryna jaýap bere alady.
«Aita keterligi, Parlamenttiń rólin arttyrý, sailaý júiesin jetildirý, partiialardy damytý múmkindikteri, quqyq qorǵaý júiesin kúsheitý, ákimshilik-aýmaqtyq qurylymǵa ózgerister engizýmen qatar, buqaralyq aqparat quraldary men azamattyq qoǵamnyń rólin arttyrýǵa bailanysty birqatar tapsyrmalar berildi. Sonyń ishinde BAQ týraly jańa zań qabyldaý. Qazirgi qoldanystaǵy 1999 jylǵy zańǵa 2017 jyly aýqymdy ózgerister engizilgen bolatyn»,- deidi ol.
Ásel Nazarbetovanyń sózinshe, búginde birqatar memleketterde buqaralyq aqparat quraldary azamattardy saiasi tárbieleý, olardy ishki jáne halyqaralyq mańyzdy oqiǵalar týraly habardar etý, olarda adekvatty saiasi minez-qulyq pen kózqarasty qalyptastyrý fýnktsiialaryn sátti júzege asyrýda.
«Alaida BAQ-ty teris maqsatta, iaǵni artyqshylyqty áleýmettik toptardyń saiasi ústemdigin nyǵaitý úshin paidalanatyn jaǵdailary joqqa shyǵarylmaidy. Qazaqstandaǵy media-saiasattyń júzege asyrylýy BAQ-tyń memleket tarapynan shekten tys baqylaýynda bolǵan kezde «etatistik BAQ saiasaty» retinde sipattalady. Sonymen qatar, Qazaqstanda iri aqparattyq resýrstardy ideologiialyq jumystyń tiimdi quralyna ainaldyrý maqsatynda olarǵa baqylaýdy kúsheitýge baǵyttalǵan BAQ saiasaty júrgizilýde. BAQ damýynyń zamanaýi shyndyǵy jýrnalisterdiń jeke jaýapkershiligin arttyrýdy talap etedi, ol týraly Memleket basshysy óz joldaýynda atap ótti», - deidi spiker.
QR Prezidenti janyndaǵy Qazaqstan strategiialyq zertteýler institýtynyń ókili Eýropa elindegi buqaralyq aqparat quraldarynyń róli men jumysyna toqtaldy.
«Eýropa elderiniń BAQ-taǵy ózin-ózi retteý mehanizmi tájiribesine qarasaq, AQSh-ta, Ulybritaniiada jáne Frantsiiada baspasózdiń ózin-ózi retteýiniń yqpaldy mehanizmi joq. Frantsiiada basylymdardyń jumysynda mańyzdy ról atqaratyn negizgi BAQ jýrnalisteriniń qaýymdastyǵy bar. Bul turǵyda Germaniiadaǵy BAQ jumysyna nazar aýdarǵan jón, munda BAQ úkimet nemese partiialar tarapynan baqylanbaidy, olar táýelsiz jáne olardyń kózqarasy árqashan memlekettiń resmi ustanymymen sáikes kele bermeidi. Germaniiadaǵy baqylaýshy organnyń fýnktsiialaryn ózin-ózi baqylaý keńesi oryndaidy. Keńesti gazet-jýrnal shyǵarýshylardyń federaldyq odaqtary, sondai-aq Germaniia jýrnalister odaǵy men BAQ qyzmetkerleriniń kásipodaq uiymy qurǵan», - dedi Ásel Nazarbetova.
