AQSh Reseige qarsy jańa sanktsiia salýdy josparlap otyr, bul joly prezident Vladimir Pýtinmen bailanysy bar reseilik milliarderler nysanaǵa iligýi múmkin, - dep habarlady BAQ.
Reuters agenttigi men Washington Post gazetiniń aty-jónin atamaǵan amerikalyq sheneýnikke siltep habarlaýynsha, Kremldiń 2016 jyly AQSh prezidenti sailaýyn kiligýine jaýap sharalaryn qabyldaý týraly zańy aiasynda kem degende Reseidiń bes azamatyna sanktsiia salynbaq.
Washington Post basylymynyń jazýynsha, jańa sanktsiia AQSh Qarjy ministrligi qańtar aiynda jariialaǵan tizimdegi aýqatty adamdarǵa salynady. Ol tizimge memlekettik "Gazprom" kompaniiasynyń basshysy Aleksei Miller, "Rosneft" kompaniiasynyń basshysy Igor Sechin siiaqty biznesmender bar.
Reuters-tiń habarlaýynsha, jańa sanktsiia 5 sáýirde-aq jariialanatynyn habarlasa, Washington Post sanktsiia 6 sáýirde salynatynyn jazdy.
AQSh sońǵy ret 15 naýryzda reseilik 19 azamat pen bes uiymǵa, onyń ishinde Resei barlaý qyzmetine qarsy sanktsiia salǵan. Sanktsiiaǵa ilingender AQSh-taǵy prezident sailaýy kampaniiasyna kiligip, hakerlik shabýyldar jasady dep aiyptalǵan.
AQSh Kongresiniń keibir músheleri buǵan deiin Donald Tramp ákimshiligin Reseige sailaý protsesine kilikkeni úshin jetkilikti túrde jaza qoldanbady dep synaǵan.
