اقش رەسەيگە قارسى جاڭا سانكتسييا سالۋدى جوسپارلاپ وتىر, بۇل جولى پرەزيدەنت ۆلاديمير پۋتينمەن بايلانىسى بار رەسەيلٸك ميللياردەرلەر نىساناعا ٸلٸگۋٸ مٷمكٸن, - دەپ حابارلادى باق.
Reuters اگەنتتٸگٸ مەن Washington Post گازەتٸنٸڭ اتى-جٶنٸن اتاماعان امەريكالىق شەنەۋنٸككە سٸلتەپ حابارلاۋىنشا, كرەملدٸڭ 2016 جىلى اقش پرەزيدەنتٸ سايلاۋىن كيلٸگۋٸنە جاۋاپ شارالارىن قابىلداۋ تۋرالى زاڭى اياسىندا كەم دەگەندە رەسەيدٸڭ بەس ازاماتىنا سانكتسييا سالىنباق.
Washington Post باسىلىمىنىڭ جازۋىنشا, جاڭا سانكتسييا اقش قارجى مينيسترلٸگٸ قاڭتار ايىندا جارييالاعان تٸزٸمدەگٸ اۋقاتتى ادامدارعا سالىنادى. ول تٸزٸمگە مەملەكەتتٸك "گازپروم" كومپانيياسىنىڭ باسشىسى الەكسەي ميللەر, "روسنەفت" كومپانيياسىنىڭ باسشىسى يگور سەچين سيياقتى بيزنەسمەندەر بار.
Reuters-تٸڭ حابارلاۋىنشا, جاڭا سانكتسييا 5 سەۋٸردە-اق جارييالاناتىنىن حابارلاسا, Washington Post سانكتسييا 6 سەۋٸردە سالىناتىنىن جازدى.
اقش سوڭعى رەت 15 ناۋرىزدا رەسەيلٸك 19 ازامات پەن بەس ۇيىمعا, ونىڭ ٸشٸندە رەسەي بارلاۋ قىزمەتٸنە قارسى سانكتسييا سالعان. سانكتسيياعا ٸلٸنگەندەر اقش-تاعى پرەزيدەنت سايلاۋى كامپانيياسىنا كيلٸگٸپ, حاكەرلٸك شابۋىلدار جاسادى دەپ ايىپتالعان.
اقش كونگرەسٸنٸڭ كەيبٸر مٷشەلەرٸ بۇعان دەيٸن دونالد ترامپ ەكٸمشٸلٸگٸن رەسەيگە سايلاۋ پروتسەسٸنە كيلٸككەنٸ ٷشٸن جەتكٸلٸكتٸ تٷردە جازا قولدانبادى دەپ سىناعان.
