Prodiýser Baian Alagózova jýrnalist Aman Tasyǵanǵa bergen suhbatynda jubaiy Tursyn Alagózovtiń burynǵy áielimen qarym-qatynasy týraly aitty, dep habarlaidy ult.kz.
Jýrnalist Baian Alagózovadan Tursynnyń birinshi áielimen bir dastarhan basynda otyrýy múmkin be dep suraǵan.
Prodiýser mundai jaǵdaidy joqqa shyǵarmaitynyn aitty. Onyń sózinshe, ortaq balalar bolǵandyqtan, burynǵy renishten góri olardyń kóńili men múddesin birinshi orynǵa qoiǵan durys.
«Eshqashan “eshqashan” deme deidi ǵoi. Eger adamdar ajyrasqanda aiǵai-shýsyz, dúnie bólispei, urys-kerissiz, bir-birine qastyq jasamai, mádenietti túrde aiyrylysa alsa, bári áldeqaida jaqsy bolar edi. Sondyqtan men eshteńeni joqqa shyǵarmaimyn. Ol – men aralasatyn balalardyń anasy. Men buǵan qarsy emespin», – dedi Baian.
Sondai-aq ol Tursyn Alagózovtiń uly Arsenniń bolashaq úilený toiy týraly da aitty. Baian mundai mańyzdy sátte jubaiynyń janynda bolyp, toiǵa otbasy múshesi retinde qatysqysy keletinin jetkizdi.
