Aqtóbelik emshi Baǵdagúl Lepesova ákimshilik jaýapqa tartyldy. Sot ony prodiýser Baian Alagózova men jýrnalist Dinara Sátjanǵa qatysty jala jabý boiynsha kináli dep tanyp, 1 mln 557 myń teńge aiyppul saldy, dep habarlaidy ult.kz.
Sotta jábirlenýshi retinde tanylǵan Baian Alagózova emshiniń áleýmettik jelidegi málimdemeleri ózine moraldyq turǵyda aýyr tigenin aitty.
Onyń sózinshe, Lepesova tikelei efirde ózi týraly esirtkige táýeldi ekeni, memleketten qarjy alyp, ony jeke qajetine jumsaityny jáne basqa da aiyptaýlar aitqan.
«Meni qorlady, kemsitti. Munyń bárin tyńdap otyrýǵa laiyqty emespin. Barlyq portaldan kórdim. Osy sebepti tipti TikTok paraqshamdy óshirip tastadym. Tulǵa, adam retinde eńseńdi ezip jiberedi. Esirtkige qumar, memleketten aqsha alyp, jigitterdi jaldaidy, aqshany óz qajettiligine jumsaidy dep aitqan. Kóp qorlap, jala japty. Men ádil sheshim shyǵaryp, Lepesovany jazalaýdy suraimyn», – dedi Alagózova.
Al Baǵdagúl Lepesova sotta daýly beinejazbaǵa qatysy joq ekenin aityp, taǵylǵan aiyppen kelispedi. Onyń qorǵaýshysy da Lepesovanyń bul videony ózi túsirmegenin jáne jábirlenýshilerge qatysty mundai pikirler aitpaǵanyn alǵa tartty.
Baǵdagúl Lepesova áleýmettik jelide synyqshy ári emshi retinde tanylǵan. Sońǵy ýaqytta onyń tikelei efirlerdegi málimdemeleri qoǵam arasynda jii talqyǵa túsip júr.
Bul daýǵa jýrnalist ári telejúrgizýshi Dinara Sátjanǵa qatysty aitylǵan sózder de sebep bolǵan. Keiin Sátjan emshiniń qyzmeti men tabysyna bailanysty birqatar suraq kóterdi.
Atap aitqanda, ol «aqyly bata» arqyly túsetin qarajattyń qaida aýdarylatynyn, salyq tólei me jáne adam emdeýge tiisti litsenziiasy bar ma degen máselelerdi anyqtaýdy usyndy.
Sot sheshimimen Baǵdagúl Lepesova ákimshilik jaýapqa tartylyp, oǵan 1 mln 557 myń teńge kóleminde aiyppul taǵaiyndaldy.
