Parlament Májilisiniń jalpy otyrysynda «Qazaqstan Respýblikasynyń keibir zańnamalyq aktilerine reiderlikke qarsy kúresti kúsheitý, kásipkerlik qyzmetti memlekettik organdar men laýazymdy adamdardyń zańsyz aralasýynan qorǵaý jáne baǵaly metaldardyń zańsyz ainalymyna kedergi keltiretin sharalardy kúsheitý máseleleri boiynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaidy "Ult aqparat".
Májilistiń Zańnama jáne sot-quqyqtyq reforma komitetiniń málimetinshe, zań jobasynda Qylmystyq, Qylmystyq-protsestik kodeksterge, «Prokýratýra týraly» jáne «Baǵaly metaldar men asyl tastar týraly» zańdarǵa túzetýler usynylady.
Olar mynalardy kózdeidi:
- kásipkerlerdi qorǵaý boiynsha joǵary qadaǵalaý quraldaryn kúsheitý, atap aitqanda, biznes sýbektilerine memlekettik organdar laýazymdy adamdarynyń olardyń qyzmetine zańsyz aralasý faktisi boiynsha tikelei prokýratýraǵa júginý quqyǵy beriledi;
- kásipkerlerdi salyqtyq quqyq buzýshylyqtar úshin qylmystyq jaýaptylyqqa tartýdyń qoldanystaǵy shekterin qaita qaraý;
- kásipkerlikti qylmystyq qýdalaý organdarynyń shamadan tys aralasýynan qorǵaý jáne tirkelgen kásipkerlerge qatysty tergeý áreketterin sottyń nemese prokýrordyń sanktsiiasymen ǵana júzege asyrý;
- reiderlik pen quqyq qorǵaý jáne baqylaýshy organdardyń kásipkerlerge qatysty zańsyz áreketterine qarsy kúresti kúsheitý, sondai-aq baǵaly metaldardyń zańsyz ainalymyna tosqaýyl qoiatyn sharalar.
Atap aitqanda, Qylmystyq kodekste baǵaly metaldar men asyl tastardyń, quramynda baǵaly metaldar bar shikizat taýarlarynyń, sondai-aq zergerlik buiymdardyń zańsyz ainalymy úshin qylmystyq jaýaptylyqty kózdeitin jeke bapty kózdeý usynylady.
Tutastai alǵanda, zań jobasynyń normalary azamattardyń quqyqtaryn qorǵaýdy arttyrýǵa, prokýratýranyń qadaǵalaýyn kásipkerlerdiń problemalaryn tiimdi sheshýge qaita baǵdarlaýǵa múmkindik beredi, kásipkerliktiń óz qyzmetine zańsyz aralasýdan, biznes sýbektilerin qylmystyq qýdalaý aiasyna tartýdan kepildikterin nyǵaitady, sondai-aq osy túzetýler baǵaly metaldardyń zańsyz ainalymyna qarsy kúresti kúsheitýge múmkindik beredi.
