Qyrǵyzstan parlamentiniń depýtaty, keshe ǵana prezidenttikke kandidat bolǵan Omýrbek Babanov ózine qatysty qozǵalǵan qylmystyq isti "saiasi is" dep atady.
"Biz búgin quqyq qorǵaý organdary tarapynan bassyzdyq jasalǵanyn kórip otyrmyz. Olar saiasi qylmystyq is qozǵap otyr. Bul bárimizge belgili", - dedi Babanov.
Ol sonymen birge eldegi jaǵdaiǵa ózin kinálap, ázázil etip kórsetýdiń qajeti joq ekenin málimdedi. "Bilik problemanyń kózi Babanovta emes ekenin túsinbeidi. Olar meni saiasi alańnan alyp tastaǵanymen, problema sheshilmeidi. Eldiń jaǵdaiy jaqsaryp ketpeidi. Shyndyq báribir shyǵady" dep qosty ol.
4 qarashada Qyrǵyzstan bas prokýratýrasy Jogorký Keńesh depýtaty, prezidenttik sailaýda úmitker bolǵan Ómirbek Babanov pen basqa tulǵalarǵa qarsy Qyrǵyzstan qylmystyq kodeksi 297-babynyń 1-tarmaǵy (konstitýtsiialyq qurylymdy kúshpen ózgertýge shaqyrý) jáne 299-babynyń 1-tarmaǵy (ultaralyq, násildik jáne dini arazdyqty qozdyrý) boiynsha qylmystyq is qozǵalǵanyn málimdegen.
Bul is Babanovtyń 28 qyrkúiekte sailaýaldy úgit-nasihat naýqany kezinde Osh qalasynyń "Ámir Temir" shaǵyn aýdany turǵyndary aldynda sóilegen sózderine bailanysty qozǵalǵan.
Qyrǵyzstan bas prokýratýrasy "Tergeýge deiingi tekserý kezinde Jogorký Kenesh depýtaty O. Babanovtyń 2017 jyly 28 qyrkúiek kúni sailaýaldy naýqany barysynda Osh qalasy Ámir Temir aýdanynyń negizinen ulty ózbek turǵyndarymen kezdeskeni anyqtaldy. Babanov olardyń qoldaýyna ie bolý maqsatynda kezdesýde etnikalyq ózbekterdiń quqyǵy shekteletini, elde ulttar teńdigi joq ekeni, memlekettik organdar tarapynan ózbekterge qysym jasalatyny týraly pikirler aityp, mundai jaǵdaiǵa belsendi túrde qarsylyq kórsetýge shaqyrǵan" dep habarlaǵan.
Omýrbek Babanovtyń ózi buǵan deiin álgi kezdesýde aitqan sózderi burmalanǵanyn, elektrondyq BAQ betterinde taraǵan videolardyń "montajdalǵanyn" málimdegen bolatyn.
"Respýblika" partiiasynyń ókilderi Omýrbek Babanovtyń qazir Reseide emdelip jatqanyn aitady. Onyń qashan elge oralatyny belgisiz.
Qyrǵyzstanda 15 qazanda ótken prezident sailaýy kezinde Ómirbek Babanov jeńiske jetken bilik partiiasy atynan túsken Sooronbai Jeenbekovtiń basty qarsylasy boldy.
