Birikken Arab Ámirliginiń «Schneider & Danzey FZC» kompaniiasy Ońtústik Qazaqstan oblysynan turmystyq qatty zattardy qaita óńdeýden ótkizetin zaýyt qurlysyn salýǵa nietti. Bul týraly atalǵan kompaniianyń basshylary Iorga Shnaider men Kreig Denzidiń Ońtústik Qazaqstan oblysynyń ákimi Janseiit Túimebaevpen kezdesýinde málim boldy.
Kezdesý barysynda qonaqtar óńir basshysyna kompaniia týraly tolyq aqparat berip, iske asyrylǵaly otyrǵan investitsiialyq jobasyn tanystyrdy. 25 jyldyq tarihy bar kompaniia túrli salalarda eńbek etedi. Negizinen biznes jobalardy ázirlep, investitsiialyq iri qurylymdardy qurýǵa járdemdesedi. Kompaniianyń bas ǵimaraty Birikken Arab Ámirliginiń Ras-Al-Haima qalasynda ornalasqan.
«Bizdiń maqsatymyz - Ońtústik Qazaqstan oblysynan turmystyq qatty zattardy qaita óńdeýden ótkizetin zaýyt salý. Bul rette bizdiń kompaniia negizgi eki baǵytta jumys isteýdi kózdep otyr. Onyń alǵashqysy – turmystyq qaldyqtardy qaita óńdeý bolsa, ekinshisi – jasyl ekonomika salasyn damytý. Atalǵan eki joba da ekologiiaǵa ziiansyz ári eki jaqqa da óte tiimdi dep oilaimyz», - dedi Iorga Shnaider myrza.
Sheteldik qonaqtardyń investitsiialyq jobasymen tanysqan oblys basshysy óńirdiń ekonomikalyq áleýetin baiandap, investorlarǵa memleket tarapynan kórsetiletin jeńildikterdi túsindirdi.
«Turmystyq qaldyqtardy óńdeý boiynsha oblysymyzǵa buǵan deiin de birneshe usynystar kelip túsken bolatyn. Alaida olardyń birqatary qaǵaz júzinde iske aspai qaldy. Oǵan birqatar sebepter bolǵany da jasyryn emes. Endigi másele – atalǵan zaýyttyń qurylysyn tezdetip bastap, iske asyrý óte mańyzdy. Bul rette jergilikti bilik arnaiy jumysshy tobyn quryp, atqarylatyn sharýalardyń kestesi túzilýi tiis», - dedi J. Túimebaev.
Búginde oblys halqynyń sany kún sanap artyp keledi. Iaǵni tutynýshy bar jerde qoqystyń da arta túsetini zańdylyq. Osy máselege toqtalǵan óńir basshysy atalǵan zaýytty Túrkistan men Kentaý qalalary tóńireginnen nemese Saryaǵash, Maqtaral aýdandarynyń mańynan salýdy usyndy.
Qonaqtar oblys basshysynyń bul usynysyn qabyl alyp, atalǵan aýmaqtarǵa arnaiy baryp tanysyp qaitýǵa nietti ekendikterin jetkizdi.
