Birikken Arab Ámirliginde (BAÁ) Covid-19-dyń taralýyn shekteý boiynsha júrgizilip jatqan profilaktikalyq jáne aldyn-alý jumystarynda jańa jetistikke qol jetkizdi. Bul týraly WAM agenttigi habarlady.
BAÁ áýejailarynda politsiia itterin koronavirýsty juqtyrǵan jolaýshylardy anyqtaý úshin paidalana bastady. BAÁ álemde bul ádisti tájiribede qoldanǵan alǵashqy el bolyp sanalady. Aita ketý kerek, adam aǵzasynda ólimge ákeletin virýsty anyqtaýǵa arnalǵan bul ádis álemniń kóptegen elderinde zerttelip jatyr.
BAÁ ádisi adamnyń jáne janýarlar densaýlyǵy qaýipsizdiginiń eń joǵary standarttaryna sáikes itter men zattar arasyndaǵy tikelei bailanystyń aldyn alatyndyǵymen erekshelenedi. Tájiribelik qoldaný aldynda qajetti zertteýler, sonymen qatar ártúrli elderdiń sarapshylarymen yntymaqtastyq ornatyldy. Covid-19 jaǵdaiyn anyqtaýda itterdi qoldaný týraly pikirtalastar men teoriialyq zertteýler kúshti iis sezimin eskere otyryp júrgizildi. Osylaisha, itterdi politsiia patrýlderimen qatar saýda ortalyqtarynda, is-sharalarda, áýejaida jáne basqa da ómirlik mańyzdy nysandarda paidalanýǵa bolady degen sheshim qabyldandy.
Áýejailarda koronavirýsty anyqtaý ádisiniń elge keletin jolaýshylarǵa naqty qoldanylýyn baqylaý úshin arnaiy toptar jumys isteidi. Birneshe sekýndtyń ishinde it adamda virýstyń bolý-bolmaýyn onyń qoltyǵynan alynǵan iisti synamasyn iiskeý arqyly anyqtai alady.
Bul ádis halyqaralyq áýejailardyń birtindep ashylýy men reister sanynyń ósýi jaǵdaiynda áýejaida jolaýshylardyń qaýipsizdigin jaqsartýǵa arnalǵan qosymsha shara retinde qarastyrylady.
