Jelide Batys Qazaqstan oblysynda túsirilgen video tarady. Onda Resei týymen júrgen áskeri tehnika kórsetilgen, - dep habarlaidy Tengrinews.kz tilshisi.
Videodan aýylda Resei týymen júrgen áskeri tehnikany kórýge bolady. Bókei ordasy aýdanynyń ákimdigi bul videoǵa qatysty túsinik berdi.
"Batys Qazaqstan oblysy, Bókei ordasy aýdanynda reseilik áskerlerdiń kólikteri júrgeni týraly áleýmettik jelilerde taraǵan beinetúsirilim boiynsha kelesini habarlaimyz: 18 sáýirde reseilik áskeri kólikter aýdan aýmaǵynda ornalasqan poligon aimaǵyna bara jatqan kezde, Bókei ordasy aýdanynyń Temir Masin aýyldyq okrýgi Bórli aýylyndaǵy dúkenge soǵyp, azyq-túlik alyp, kóp kidirmei birden jolyn jalǵastyrdy. Resei áskeriniń tarapynan qandai da bir zańsyz is-áreketter men oqiǵalar bolǵan joq", - delingen habarlamada.
