Foto: MMA
MMA-den Qazaqstan quramasynyń sportshylary Bahreinde ótetin jasóspirimder arasyndaǵy jazǵy Aziia oiyndarynan syrt qalmaqshy. Akkredittelgen federatsiia ókilderi qurlyqtaǵy keshendi jarysqa qatyspaityny týraly aqpardy alǵaly beri, jan-jaqtan jaýap izdeýde. Birikken MMA federtsiiasynyń ókilderi ózderin Aziia oiyndaryna qatysýǵa birden-bir úmitker sanasa, Qazaqstan Ulttyq Olimpiadalyq komitetiniń buǵan qatysty aitar óz ýáji bar, dep jazady Sportbugin.kz.
2024 jyldyń 30 jeltoqsanynda Aziia Olimpiadalyq keńesi (AOK) aralas jekpe-jek túrin 2026 jyly Japoniiada ótetin jazǵy Aziia oiyndarynyń baǵdarlamasyna engizdi. Sodan soń, MMA biyl Bahreinde ótetin jasóspirimder arasyndaǵy tuńǵysh Aziia oiyndarynyń baǵdarlamasyna qosylatyny da belgili boldy. Qazaqstan Birikken MMA federatsiiasynyń atqarýshy direktory Zarina Najbievanyń aitýynsha, osy jańalyqtan soń elimizdegi akkredittelgen jalǵyz MMA quramasy Aziia oiyndaryna daiyndyqty bastaǵan.
«Osy habardy alǵan soń, Aziia oiyndaryna kim qatysady degen suraq kún tártibine shyqty. Men halyqaralyq AMMA uiymyna habarlastym. Sebebi, Aziia Olimpiadalyq keńesindegi MMA sportynyń ókili osy uiym. AMMA uiymyndaǵylar Aziia oiyndaryna qatysatyn komandalardyń quramyna aralaspaitynyn, quramdy árbir eldiń Ulttyq olimpiadalyq komiteti jasaqtaitynyn málimdedi. Aqpan aiynda biz osy jarysqa irikteý retinde Qazaqstan chempionatyn ótkizip, jazǵa qarai jasóspirimder Aziadasyna qatysý úshin qujattar jinai bastadyq. Óitkeni, biz eldegi jalǵyz resmi MMA federatsiiasy bolǵandyqtan, ulttyq quramamany biz jasaqtaimyz. Osy oraida, resmi qurama, akkredittelgen uiym bolǵandyqtan, bizdiń elimizdiń atynan basqa sportshylardy qatystyrýǵa bolmaitynyn aitqym keledi.
Biz halyqaralyq bólimmen habarlasyp, jas erekshelikterine sai sportshylardy tańdap qoidyq. Sodan soń, atalǵan sport túrine qarajat bólinbegendikten, jazǵy Aziia oiyndaryna baratyn sportshylardyń jol shyǵynyn kóterýdi oblystyq sport basqarmalarynan ótindik. Sportshylardyń ata-anasynan ruqsat qaǵazyn alyp, mindetti ADEL/WADA antidopingtik kýrstarynan ótken sertifikattardy da daiyndap qoiǵanbyz. Biraq jaqynda oblystardan habar keldi. Olar Aziadaǵa basqa quram baratynyn, atalǵan quram Almatyda oqý-jattyǵý jiynyn ótkizip jatqanyn estigen. Sol sebepti, ushaqqa bilet alý máselesin keiinge shegerip qoiǵan.
2025 jyldyń 29 tamyzyna deiin barlyq qujatty tapsyrdyq. Týrizm jáne sport ministrligi aimaqtarǵa hat jiberdi. Biraq túpkilikti tizim qurylǵan kezde, MMA sport túri retinde Qazaqstan Ulttyq Olimpiadalyq komitetinen usynylmaǵan», — deidi MMA federatsiiasynyń atqarýshy direktory Zarina Najbieva.
Osy saýalǵa qatysty, Qazaqstan Ulttyq olimpiadalyq komiteti ókilderiniń resmi jaýaby belgili boldy. Uiymnyń baspasóz qyzmetiniń málimetinshe, bul jerde týrnirdi uiymdastyrýshy AMMA qaýymdastyǵy erekshe rol oinaǵan.
«Olimpiadalyq emes sport túri sanalatyn aralas jekpe-jek (MMA) 2025 jyly Bahreinde ótetin Jasóspirimder Aziia oiyndarynyń baǵdarlamasyna engizildi. Aziia oiyndarynda MMA jarystarynyń resmi uiymdastyrýshysy – Asian Mixed Martial Arts Association (AMMA) uiymy sanalady. Dál osy uiymǵa Aziia Olimpiada keńesi (AOK) tarapynan tiisti ókilettikter berilgen.
Óz kezeginde, AMMA óz jumysyn tek quramynda resmi músheligi bar federatsiialarmen ǵana júrgizedi. Sporttyq ótinimder men ózge de ilespe qujattar úshinshi taraptaǵy sporttyq uiymdardyń jazbasha rastaýynsyz qabyldanbaidy.
Búgingi kúnge deiin Qazaqstan Respýblikasynan AMMA quramyndaǵy resmi múshe – Mixed Martial Arts Ulttyq federatsiiasy.
Sonymen qatar, AMMA uiymy biylǵy jyldyń 29-30 tamyz kúnderi jasóspirimder arasyndaǵy alǵashqy Aziia chempionatyn ótkizdi. Atalǵan jarys aldaǵy jasóspirimder Aziadasyna qatysý úshin irikteý kezeńi bolyp esepteldi. AMMA resmi saitynda jariialanǵan aqparatqa sáikes, Qazaqstan sportshylary jalpykomandalyq esepte 2-oryn ielendi.
Osyǵan sáikes, Qazaqstan sportshylary Bahreinde ótetin 2025 jylǵy Jasóspirimder Aziia oiyndaryna AOK men AMMA belgilegen erejelerge sáikes qatysatyn bolady”, — delingen Qazaqstan UOK málimetinde.
Birikken Qazaqstan MMA federatsiiasy 2013 jyldan beri atalǵan sport túri boiynsha akkredittelgen uiym sanalady. Búginde osy uiymnan túlep ushqan sportshylar qatarynda UFC juldyzy Shavkat Rahmonov, Sergei Morozov, Dáýren Ermekov syndy tanymal jaýyngerler bar.
