فوتو: مما
مما-دەن قازاقستان قۇراماسىنىڭ سپورتشىلارى باحرەيندە ٶتەتٸن جاسٶسپٸرٸمدەر اراسىنداعى جازعى ازييا ويىندارىنان سىرت قالماقشى. اككرەديتتەلگەن فەدەراتسييا ٶكٸلدەرٸ قۇرلىقتاعى كەشەندٸ جارىسقا قاتىسپايتىنى تۋرالى اقپاردى العالى بەرٸ, جان-جاقتان جاۋاپ ٸزدەۋدە. بٸرٸككەن مما فەدەرتسيياسىنىڭ ٶكٸلدەرٸ ٶزدەرٸن ازييا ويىندارىنا قاتىسۋعا بٸردەن-بٸر ٷمٸتكەر ساناسا, قازاقستان ۇلتتىق وليمپيادالىق كوميتەتٸنٸڭ بۇعان قاتىستى ايتار ٶز ۋەجٸ بار, دەپ جازادى Sportbugin.kz.
2024 جىلدىڭ 30 جەلتوقسانىندا ازييا وليمپيادالىق كەڭەسٸ (اوك) ارالاس جەكپە-جەك تٷرٸن 2026 جىلى جاپونييادا ٶتەتٸن جازعى ازييا ويىندارىنىڭ باعدارلاماسىنا ەنگٸزدٸ. سودان سوڭ, مما بيىل باحرەيندە ٶتەتٸن جاسٶسپٸرٸمدەر اراسىنداعى تۇڭعىش ازييا ويىندارىنىڭ باعدارلاماسىنا قوسىلاتىنى دا بەلگٸلٸ بولدى. قازاقستان بٸرٸككەن مما فەدەراتسيياسىنىڭ اتقارۋشى ديرەكتورى زارينا ناجبيەۆانىڭ ايتۋىنشا, وسى جاڭالىقتان سوڭ ەلٸمٸزدەگٸ اككرەديتتەلگەن جالعىز مما قۇراماسى ازييا ويىندارىنا دايىندىقتى باستاعان.
«وسى حاباردى العان سوڭ, ازييا ويىندارىنا كٸم قاتىسادى دەگەن سۇراق كٷن تەرتٸبٸنە شىقتى. مەن حالىقارالىق امما ۇيىمىنا حابارلاستىم. سەبەبٸ, ازييا وليمپيادالىق كەڭەسٸندەگٸ مما سپورتىنىڭ ٶكٸلٸ وسى ۇيىم. امما ۇيىمىنداعىلار ازييا ويىندارىنا قاتىساتىن كوماندالاردىڭ قۇرامىنا ارالاسپايتىنىن, قۇرامدى ەربٸر ەلدٸڭ ۇلتتىق وليمپيادالىق كوميتەتٸ جاساقتايتىنىن مەلٸمدەدٸ. اقپان ايىندا بٸز وسى جارىسقا ٸرٸكتەۋ رەتٸندە قازاقستان چەمپيوناتىن ٶتكٸزٸپ, جازعا قاراي جاسٶسپٸرٸمدەر ازياداسىنا قاتىسۋ ٷشٸن قۇجاتتار جيناي باستادىق. ٶيتكەنٸ, بٸز ەلدەگٸ جالعىز رەسمي مما فەدەراتسيياسى بولعاندىقتان, ۇلتتىق قۇرامامانى بٸز جاساقتايمىز. وسى ورايدا, رەسمي قۇراما, اككرەديتتەلگەن ۇيىم بولعاندىقتان, بٸزدٸڭ ەلٸمٸزدٸڭ اتىنان باسقا سپورتشىلاردى قاتىستىرۋعا بولمايتىنىن ايتقىم كەلەدٸ.
بٸز حالىقارالىق بٶلٸممەن حابارلاسىپ, جاس ەرەكشەلٸكتەرٸنە ساي سپورتشىلاردى تاڭداپ قويدىق. سودان سوڭ, اتالعان سپورت تٷرٸنە قاراجات بٶلٸنبەگەندٸكتەن, جازعى ازييا ويىندارىنا باراتىن سپورتشىلاردىڭ جول شىعىنىن كٶتەرۋدٸ وبلىستىق سپورت باسقارمالارىنان ٶتٸندٸك. سپورتشىلاردىڭ اتا-اناسىنان رۇقسات قاعازىن الىپ, مٸندەتتٸ ADEL/WADA انتيدوپينگتٸك كۋرستارىنان ٶتكەن سەرتيفيكاتتاردى دا دايىنداپ قويعانبىز. بٸراق جاقىندا وبلىستاردان حابار كەلدٸ. ولار ازياداعا باسقا قۇرام باراتىنىن, اتالعان قۇرام الماتىدا وقۋ-جاتتىعۋ جيىنىن ٶتكٸزٸپ جاتقانىن ەستٸگەن. سول سەبەپتٸ, ۇشاققا بيلەت الۋ مەسەلەسٸن كەيٸنگە شەگەرٸپ قويعان.
2025 جىلدىڭ 29 تامىزىنا دەيٸن بارلىق قۇجاتتى تاپسىردىق. تۋريزم جەنە سپورت مينيسترلٸگٸ ايماقتارعا حات جٸبەردٸ. بٸراق تٷپكٸلٸكتٸ تٸزٸم قۇرىلعان كەزدە, مما سپورت تٷرٸ رەتٸندە قازاقستان ۇلتتىق وليمپيادالىق كوميتەتٸنەن ۇسىنىلماعان», — دەيدٸ مما فەدەراتسيياسىنىڭ اتقارۋشى ديرەكتورى زارينا ناجبيەۆا.
وسى ساۋالعا قاتىستى, قازاقستان ۇلتتىق وليمپيادالىق كوميتەتٸ ٶكٸلدەرٸنٸڭ رەسمي جاۋابى بەلگٸلٸ بولدى. ۇيىمنىڭ باسپاسٶز قىزمەتٸنٸڭ مەلٸمەتٸنشە, بۇل جەردە تۋرنيردٸ ۇيىمداستىرۋشى امما قاۋىمداستىعى ەرەكشە رول ويناعان.
«وليمپيادالىق ەمەس سپورت تٷرٸ سانالاتىن ارالاس جەكپە-جەك (مما) 2025 جىلى باحرەيندە ٶتەتٸن جاسٶسپٸرٸمدەر ازييا ويىندارىنىڭ باعدارلاماسىنا ەنگٸزٸلدٸ. ازييا ويىندارىندا مما جارىستارىنىڭ رەسمي ۇيىمداستىرۋشىسى – Asian Mixed Martial Arts Association (AMMA) ۇيىمى سانالادى. دەل وسى ۇيىمعا ازييا وليمپيادا كەڭەسٸ (اوك) تاراپىنان تيٸستٸ ٶكٸلەتتٸكتەر بەرٸلگەن.
ٶز كەزەگٸندە, AMMA ٶز جۇمىسىن تەك قۇرامىندا رەسمي مٷشەلٸگٸ بار فەدەراتسييالارمەن عانا جٷرگٸزەدٸ. سپورتتىق ٶتٸنٸمدەر مەن ٶزگە دە ٸلەسپە قۇجاتتار ٷشٸنشٸ تاراپتاعى سپورتتىق ۇيىمداردىڭ جازباشا راستاۋىنسىز قابىلدانبايدى.
بٷگٸنگٸ كٷنگە دەيٸن قازاقستان رەسپۋبليكاسىنان AMMA قۇرامىنداعى رەسمي مٷشە – Mixed Martial Arts ۇلتتىق فەدەراتسيياسى.
سونىمەن قاتار, AMMA ۇيىمى بيىلعى جىلدىڭ 29-30 تامىز كٷندەرٸ جاسٶسپٸرٸمدەر اراسىنداعى العاشقى ازييا چەمپيوناتىن ٶتكٸزدٸ. اتالعان جارىس الداعى جاسٶسپٸرٸمدەر ازياداسىنا قاتىسۋ ٷشٸن ٸرٸكتەۋ كەزەڭٸ بولىپ ەسەپتەلدٸ. AMMA رەسمي سايتىندا جارييالانعان اقپاراتقا سەيكەس, قازاقستان سپورتشىلارى جالپىكوماندالىق ەسەپتە 2-ورىن يەلەندٸ.
وسىعان سەيكەس, قازاقستان سپورتشىلارى باحرەيندە ٶتەتٸن 2025 جىلعى جاسٶسپٸرٸمدەر ازييا ويىندارىنا اوك مەن AMMA بەلگٸلەگەن ەرەجەلەرگە سەيكەس قاتىساتىن بولادى”, — دەلٸنگەن قازاقستان ۇوك مەلٸمەتٸندە.
بٸرٸككەن قازاقستان مما فەدەراتسيياسى 2013 جىلدان بەرٸ اتالعان سپورت تٷرٸ بويىنشا اككرەديتتەلگەن ۇيىم سانالادى. بٷگٸندە وسى ۇيىمنان تٷلەپ ۇشقان سپورتشىلار قاتارىندا UFC جۇلدىزى شاۆكات راحمونوۆ, سەرگەي موروزوۆ, دەۋرەن ەرمەكوۆ سىندى تانىمال جاۋىنگەرلەر بار.
