Elordada ótken Aziia qalamgerleriniń tuńǵysh forýmynda ádebi jýrnal men gazet nómirlerin birlesip shyǵarý týraly sheshim qabyldandy. Bul jaiynda Tájikstan Jazýshylar odaǵynyń tóraǵasy Nizom Kosim aitty, dep habarlaidy QazAqparat.
«Forým birlesken jumystardyń ári qaraiǵy josparyn belgileý úshin óte yńǵaily alań boldy. Biz aldaǵy ýaqytta ádebi jýrnaldar men gazetterdiń birlesken nómirin shyǵarýǵa ýaǵdalastyq. Bul oqyrmandarymyzdyń ózge elderdiń, kórshileriniń ádebi shyǵarmashylyǵymen tanys bolýy úshin jasalady. Menińshe, bul da halyqtarymyzdy jaqyndastyra túsýge septigin tigizedi», - dedi Nizom Kosim forýmnyń jabylýyna arnalǵan saltanatty shara aiasynda.
Onyń atap ótýinshe, atalǵan basylymdardyń formaty aldaǵy ýaqytta egjei-tegjeili talqylanady. Basylym nómiri jergilikti nemese sheteldik qalamgerdiń shyǵarmalaryna ne bolmasa naqty bir eldiń ádebietine arnalýy mumkin.
«Barlyq, ásirese burynǵy keńestik keńistikten shyqqan Jazýshylar odaǵynyń negizgi jumys baǵyttarynyń biri - ózge eldermen, ásirese baýyrlas respýblikalarmen mádeni bailanysty jolǵa qoiyp, nyǵaitý. Bul oraida Qazaqstan bárimizdi basyp ozdy. Bul - elderińizde ótip jatqan osymen úshinshi halyqaralyq ádebi shara bolyp otyr. Men onyń ekeýine qatysqan edim. Tamasha áser aldym», - dedi ol.
Aita keteiik, forým aiasyndaǵy úsh kún ishinde uiymdastyrýshylar men qatysýshylardyń arqasynda aýqymdy da jemisti ister atqaryldy. Paneldik sessiialar, pikirtalas, kezdesýler sətti ótip, memorandýmǵa qol qoiylyp, Jazýshylar alleiasy ashyldy. Birinshi kúnniń jalpy otyrysyna Memleket basshysy Qasym-Jomart Toqaev arnaiy qatysyp, naqty usynystar da jasady.
