Aziia ádebieti batysty baǵdar tutpai, erkin damýy kerek. Aziia qalamgerleriniń I forýmynda sóz sóilegen Nobel syilyǵynyń ádebiet boiynsha nominanty Ko Yn osyndai pikir aitty, dep habarlaidy QazAqparat.
Halyqaralyq «Manhe» ádebi syilyǵynyń, «Griffin» poeziia syilyǵynyń laýreaty, halyqaralyq «Altyn táj» ordeniniń iegeri, ádebiet salasyndaǵy Nobel syilyǵynyń nominanty - koreialyq Ko Yn elorda tórindegi sharanyń Aziia ádebieti tarihynda balamasy joq ekenin atady.
«Aziia qalamgerleriniń tuńǵysh forýmyna qatysqanyma qýanyshtymyn. Qazaqstandyq áriptesterime, barlyq uiymdastyrýshylarǵa búkil qurlyq qalamgerleriniń basyn qosqany úshin alǵys aitqym keledi. Bar ómirin ádebietke arnaǵan qalamgerlerdiń basyn qosyp, osynshalyq úilesimdi atmosfera qurý - shynymen de eleýli oqiǵa. Ortalyq Aziianyń sheksiz múmkindiktri men keleshegin ańdatatyn osyndai ǵalamat jobaǵa ózimniń súiinishimdi bildirgim keledi. Sintez rýhymen júremiz desek, ár qadamymyzdy eseptei bilýimiz kerek. Jaqynda ótken Aziia ádebieti festivaliniń ashylý saltanatynda men Afrika men Aziiany, Latyn Amerikasyn «úshinshi álem» dep ataýǵa túbegeili qarsy ekenimdi aittym», - dep bastaǵan Ko Yn áriptesterin eýropalyq ádebi aǵymdardyń jeteginde ketpei, Batys tájiribesin tól muramen baiyta bilýge shaqyrdy.
«Búgingi jaǵdaidy zerdelei otyryp, Aziianyń árbir bóligi, árbir eli, mádenieti óziniń túpnusqa beinesin tapsa degen oiǵa keldim. Aziia Eýropa siiaqty birtutas emes ekeni anyq. Eýropa erte birigip, jalpy alǵanda bir dinge bas urdy. Biraq bizdiń keibir kórshiler Eýropa elderimen týystasyp ketti. Aziiada mundai tutastyq múmkin emes. Aziia - tabiǵi erekshelikterdiń, taý men dalanyń, shól men kóldiń astasyp jatqan álemi. Osy árkelkilik ádebietke de tán. Aziianyń dinderi men filosofiialyq júiesi de tereń ári kúrdeli. Eń alǵash Aziia órkenieti skifterden tarady. Keiin ol qara teńiz arqyly búkil álemge tarady. Aziia qaitadan túlep, jańa núkteden bastaýy kerek degen oilar da aitylady. Menińshe, árqaisymyz erkin bolýymyz kerek. Batysqa baǵdar retinde qaraýdan bas tartýymyz qajet. Tipti kei jaǵdaida Aziia ádebieti Eýropa ádebietin jasartty, tyń lep qosty. Baýyrlas jazýshylarǵa qarap otyryp, Aziia ádebieti – búginginiń ádebieti, Aziia ádebieti – jańa ǵalamsharlyq ádebiet degen oiǵa keldim», - dedi koreialyq aqyn.
